Omicron ul ndjeshëm mbrojtjen nga Pfizer – Dy doza janë 23% efektive, por mbrojnë nga sëmundja e ashpër, sipas studimit
Kursi me dy doza i vaksinës së Pfizer ka një efektshmëri prej vetëm 22.5% kundër infeksionit simptomatik me variantin Omicron, por mund të parandalojë sëmundjen e ashpër, sipas eksperimenteve laboratorike në Afrikën e Jugut. Hulumtuesit në Institutin e Hulumtimeve Shëndetësore në Durban, ofruan të dhëna shtesë mbi një studim të vogël të publikuar më herët gjatë javës.
Hulumtuesit kanë vlerësuar mostra të plazmës së gjakut nga 12 pjesëmarrës. Shkencëtarët zbuluan se niveli i antitrupave neutralizues të prodhuar nga njerëzit që kanë marrë 2 doza të Pfizer është 41 herë më i ulët kundër variantit Omicron, se sa ndaj variantit të zbuluar përpara 2 vitesh në Kinë. “Kjo do cënojë aftësinë e vaksinës për të mbrojtur kundër infeksionit” – bëri të ditur ekipi i shkencëtarëve i drejtuar nga kreu i laboratorit Alex Sigal. Megjithatë, ata shtuan se ka mbrojtjte të mjaftueshme kundër sëmundjes së ashpër.
Ekipi këtë javë ishte i pari që tregoi se varianti, i zbuluar nga shkencëtarët në Afrikën e Jugut dhe Botswana më 25 Nëntor, mund t’i shpëtojë kryesisht antitrupave të prodhuara nga vaksina e Pfizer. Megjithatë, ata thanë se doza nxitëse mund të rrisë imunitetin, çka është mbështetur edhe nga studimet e bëra nga vetë Pfizer. Të dhënat paraprake në Mbretërinë e Bashkuar, treguan se dozat nxitëse nga AstraZeneca dhe Pfizer me BioNTech, përmirësojnë mgrojtjten ndaj variantit Omicron deri në 75%, në ditët e para pas injeksionit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.