“Operacion i gjerë për lidhjet e paligjshme të ujit”- Energjia, Gjiknuri: Së shpejti ankand për impiantin më të madh fotovoltaik. Shpërbëhet OSHEE, funksioni që do ketë institucioni i ri
Gjatë prezantimit të programit të qeverisë, ministri Gjiknuri foli për një operacion të gjerë kundër lidhjeve të paligjshme të ujit të pijshëm, por edhe për reformën në energji, ku sipas tij jo vetëm do të thellohet reforma e nisur në mandatin e parë të qeverisë “Rama 1”, por do të synohet më tej për të përdorur edhe burime të tjera.
Kreu i Ministrisë së Infrastrukturës dhe Energjisë foli edhe për shpërbërjen e Operatorit të Shpërndarjes së Energjisë, duke krijuar një kompani të re për shitjen e energjisë dhe injektimin e shpenzimeve në sistemin e shpërndarjes.
“Do nisim një operacion kundër lidhjeve të paligjshme të ujit në bashkëpunim me vendorët. Sa i takon ujësjellësve, përmes sistemit të performancës do të shpërndahen paratë për investime, duhet të performosh, qeveria nuk ka pse të financoje pa limit. Në bazë të pagesave, me skemë të re do bëjmë të mundur financimin e ujësjellësve dhe menaxhimin e tyre. Nuk mund të kemi ujësjellës që krijojnë borxhe që nuk paguajnë energjinë dhe lënë njerëzit pa ujë. Sa i takon energjisë, qeveri do të synojë konsolidimin e kësaj reforme që ka dhënë rezultate. Qeveria do synojë thellimin e reformës, diversifikim të burimeve jo vetëm ujore, diellore, por edhe me anë të erës. Do të shpërbëhet Operatori i Shpërndarjes së Energjisë duke krijuar një kompani të re për shitjen e energjisë dhe injektimin e shpenzimeve në sistemin e shpërndarjes. Shitja do të përmirësojë më shumë furnizimin me energji dhe shërbimin ndaj qytetarit, distribucioni të thithë investime të tjera që në 4 vitet e ardhshme do të kapin një vlerë prej 500 mln eurosh, duke përmirësuar sistemin e shpërndarjes në 60 për qind.”
Ministri Foli edhe për investimin në diga dhe kaskadën e Drinit
“Në 4 vitet e ardhshme 170 mln euro do të investohen në kapacitetet aktuale gjeneruese në Kaskadën e Drinit, në rinovimin e pajisjeve për sigurinë në diga. Në transmetim injektohen mbi 160 mln euro te tjera, pasi Shqipëria përfitoi nga linja e interkonektivitetit. Investime do të ketë Kaskadën e Vjosës, shpejt do të përfundojnë procedurat edhe për Kalivaçin”, tha Gjiknuri.
Ai nuk la pa përmendur edhe një ankand të madh që do të organizohet me BERZH për ngritjen e impiantit më të madh fotovoltaik.
“Shqipëria përveç prodhimit hidro do të ketë edhe energjinë e diellit dhe të erës. Kemi një plan të miratuar, tarifë të miratuar dhe së shpejti do zhvillojmë ankandin më të madh me BERZH për të ngritur impiantin më të madh fotovoltaik”, u shpreh ministri i Infrastrukturës dhe Energjisë.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.