Operacion kirurgjik përmes 5G – Ja “interneti i aftësive”
Koha jashtëzakonisht e shkurtër e reagimit është padyshim përfitimi më i madh nga 5G-ja. Ndonëse nuk ndihet shumë, ka një vonesë me 4G nga koha kur një pajisje komunikon me rrjetin tek koha kur pajisja merr një përgjigje.
Rrjetet 5G eliminojnë këtë vonesë duke lejuar që në të ardhmen një kirurg të kryejë një operacion tek pacienti i tij pa qenë domosdoshmërisht në dhomë.
Ericsson në bashkëpunim me startup-in NeuroDigital Technologies dhe me doktorë nga King’s College në Londër kanë përdorur një pacient plastik për të treguar se si një kirurg mund të kryejë operacione në distancë.
Kirurgu duhet të vendosë një pajisje virtuale në kokë për të parë çfarë ndodh në sallën e operacionit, si edhe një palë dorashka të veçanta të cilat kontrollojnë një krah robotik i cili kryen operacionin në të vërtetë.
Dorashka është e pajisur me një teknologji e cila të krijon idenë e prekjes, përmes sensorëve shqisorë të cilët dridhen kur preket organi, duke dhënë ndjesinë sikur po kryen realisht një prerje apo veprim tjetër.
Kompanitë po e quajnë këtë ide “interneti i aftësive”, sepse të lejon të transferosh njohuritë dhe ekspertizën në një distancë shumë të madhe në kohë reale.
Pa lidhjen 5G, kjo nuk do të ishte e mundur. Drejtori i teknologjisë në Ericsson Ulf Ewaldson është shprehur:
“Është hera e parë që rrjeti do të jetë më i shpejtë se mendjet tona”
Por “interneti i aftësive” nuk ndalet këtu: shumë profesione si ai i shoferit do të mund të kryhen në distancë. Një tjetër simulim i Ericsson të vendos në sediljen e shoferit të një makine e cila është në të vërtetë 50 kilometra larg.
Përmes të njëjtës teknologjie të reagimit shqisor, mund të shohësh rrugën në kohë reale dhe të ndjesh çdo gropë apo gungë të rrugës.
“Ne jemi absolutisht të bindur se 5G-ja është revolucioni i ri”, është shprehur presidenti i Samsung në SHBA, Tim Baxter.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.