Operacioni “Invest”- 33 vjeçarit i sekuestrohen pasuri në vlerë 700 mijë euro në Elbasan
Policia e Shtetit njofton finalizimin e operacionit “Invest”, për sekuestrimin e pasurive të përfituara nga aktiviteti kriminal. Në kuadër të këtij operacioni është vendosur sekuestro preventive ndaj pasurive të paluajtshme në pronësi të një 33-vjeçari, që arrijnë vlerën rreth 700 mijë euro.
“Nga strukturat e Drejtorisë Vendore të Policisë Elbasan, nën drejtimin e Prokurorisë së Rrethit Gjyqësor Elbasan, në kuadër të hetimit të procedimit penal të regjistruar pranë kësaj Prokurorie, për veprën penale “Pastrimi i produkteve të veprës penale ose veprimtarisë kriminale”, gjatë paradites së sotme u finalizua operacioni policor i koduar ” Invest”, për vendosjen e sekuestrove preventive ndaj pasurisë së 33-vjeçarit M. K., Në kuadër të operacionit u kryen veprimet procedurale dhe u vendos sekuestro preventive për pasuritë e paluajtshme, të cilat dyshohet se janë përfituar nga aktiviteti kriminal, si më poshtë: -1 apartament me sipërfaqe 350 m2, -1 truall me sipërfaqe 5000 m2, -1 ndërtesë 200 m2 si dhe 1 automjet. Nga vlerësimi paraprak i pasurive të sipërshënuara, rezulton se ato arrijnë vlerën e rreth 700 000 Eurove” njofton Policia.
Referuar njoftimit zyrtar të Policisë, në bashkëpunim me Prokurorinë Pranë Gjykatës së Shkallës së Parë Elbasan, po vijojnë hetimet dhe verifikimet, për evidentimin e pasurive të tjera të luajtshme dhe të paluajtshme në emër të këtij shtetasi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.