Opinion/ Sondazhet nuk janë gjithçka, por kandidatët për 2020-ën duhet të shqetësohen
Sa të sakta janë sondazhet e parakohshme për kandidatët presidencialë? Harry Enten në CNN vëren se 10 nga 14 kandidatët e fundit që e kanë udhëhequr në sondazhet e New Hampshire në këtë periudhë kanë arritur të fitojnë nominimin nga partia e tyre. Ai analizon se sondazhet aktuale që e tregojnë ish-nënpresidentin Joe Bajden fitues mund të jenë të sakta.
Nuk është dhe aq e sigurt gjithsesi. Disa nominime nuk janë aq të diskutueshme. Republikanët në vitin 1988 dhe Demokratët në vitin 2000 zgjodhën nënpresidentët si kandidatura të tyre; Republikanët në vitin 1980 dhe Demokratët në vitin 2016 zgjodhën kandidatët që kishin qenë shumë pranë nominimit në garat e mëparshme dhe kishin mbështetje të gjerë partiake. Po të heqim këto të katërt, sondazhi i New Hampshire ka parashikuar vetëm gjashtë nga dhjetë fituesit. Një shenjë tjetër që tregon se sondazhet nuk janë gjithçka është se në tre nga katër kandidatët që shfaqeshin fitues në sondazhet e New Hampshire nuk arritën të fitonin nominimin (në vitin 2008, 2004 dhe 1992), madje as nuk iu afruan fare.
Një rregull i përgjithshëm për tregues të atillë është se nëse nuk ka prova për një marrëdhënie sistematike, atëherë nuk mund të bësh parashikime. Gjasat janë që kjo të jetë e vërteta dhe për Joe Biden. Të diturit se udhëheqësit e hershëm të sondazheve shpesh fitojnë, është interesante, por nëse kemi arsye të mendojmë se Biden është një kandidat mjaft i dobët, çfarë rëndësie ka sondazhi i New Hampshire? Jo shumë.
Thënë kjo, disa kandidatë duhet të shqetësohen nga sondazhet në këtë pikë. Ndonëse nuk do të ishte e pazakontë për një nga kandidatët e tanishëm që të dilte papritmas në krye, (Gary Hart në vitin 1984, Mike Huckabee në vitin 2008 dhe Rick Santorum në vitin 2012 erdhën nga askund për të fituar primaret dhe për të kandiduar për nominim), do të ishte vërtetë e pazakontë ama që ndonjë prej tyre të fitonte zgjedhjet. Ka akoma shumë fushatë për t’u bërë përpara dhe s’do ishte çudi që ndonjë nga kandidatët e vegjël të merrte më shumë mbështetje, duke patur parasysh dhe që Joe Biden është një kandidat jo dhe aq i preferuar.
Por mundësia për të avancuar në mbështetje po mbyllet. Disa kandidatë kishin të ardhura të dobëta nga mbledhja e fondeve në tremujorin e dytë, dhe pa ndonjë lloj mrekullie, gjasat janë që ata të dalin shpejt nga gara. Nëse nuk heqin dorë, ata mund të vazhdojnë pa u kushtuar vëmendje askush. Në rastin më të mirë vetëm një duzinë kandidatësh do të kualifikohen për të marrë pjesë në debate televizive të shtatorit. Pra, edhe pse sondazhet kanë vlerë të kufizuar parashikuese, e vërteta është që ka kaluar goxha kohë që nga fillimi i nominimeve. Ndaj për disa kandidatë, është tepër vonë për t’u rikuperuar.
Burimi: Bloomberg
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.