Opozita në protestë – 6 orë tensione e dhunë, 17 të plagosur. Basha: Mblidhemi sërish të hënën
Tensioni dhe dhuna kanë shoqëruar protestën e 4 kombëtare të opozitës. Për më shumë se 6 orë, mes protestuesve dhe efektiveve të policisë ka pasur hedhje të bombave molotov, shashka dhe gazlotsjellës, në të tre frontet ku u zhvendos protesta. Gjatë përplasjeve kanë mbetur të plagosur efektivë e qytetarë, ndërsa mbi 50 protestues janë arrestuar . Opozita paralajmëron tubimin e radhës ditën e hënë .
Një protestë e ashpër dhe e dhunshme, ajo e zhvilluar këtë të shtunë nga opozita përpara godinës së kryeministrisë. Ndryshe nga herët e tjera në protestën e katërt kombëtare opozitare pati disa herë tensione, teksa protestuesit hodhën bomba molotov, tymuese e fishekzjarre drejtë institucioneve përfshirë dhe ambientet e Kuvendit. lideri demokrat Lulzim Basha kërkoi largimin eqeverisë dhe hapjen e rrugës për Shqipërinë drejtë Evropës teksa bëri thirrje protestuesve që të mos lëndojnë forcat e rendit
Pas më shumë se dy orë protestë para kryeministrisë, turma u zhvendos përpara parlamentit ku situata u tensionua sërish me molotov, fishekzjarre e gazlotsjellës . Dhuna e më pas ndalimi i sekretarit organizativ të PD, Sahit Dollapi, nga forcat e rendit ndezi edhe më shumë protestën, ndërsa krye demokrati Basha zhvendosi turmën drejt Drejtorisë së Policisë së Tiranës duke kërkuar lirimin e sekretarit organizativ të PD.
Protesta e opozitës zgjati më shumë se 6 orë duke shënuar kështu dhe tubimin më të tensionuar të zhvilluar deri më tani ku mbeten të plagosur 17 persona , pjesa më e madhe punonjës policie ndërkohë që janë arrestuar mbi 50 protestues për akte dhune. Opozita do të vijoj protestat edhe në ditët në vijim duke paralajmëruar një tjetër protestë kombëtare të hënën.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.