Opozita në protestë, kryeministri në seancë: Situata po ndikon në ekonomi! Ul konsumin e investimet. PO për dialog por jo për mandatin

Kuvendi është mbledhur në seancë plenare, duke pasur në rendin e ditës edhe betimin e kandidatëve për deputetë që pranuan mandatet e lëna nga opozita. kjo e fundit ndërkohë po proteston jashtë sallës së parlamentit, ku masat janë shtuar masat e sigurisë.

Kryeministri Edi Rama zgjodhi fillimin e seancës plenare për të paralajmëruar se nuk do të ketë negocim të mandatit qeverisës me opozitën dhe pse shprehu gatishmërinë për t’u ulur në bisedime për përmirësimin e procesit zgjedhor në vend.

Duke e argumentuar largimin e tij nga salla e seancave plenare për shkak të vizitës që i duhet të bëjë në Itali ku do të marrë pjesë në një intervistë televizive, kryeministri tha në fjalën e tij rreth 30 minutëshe se situata e tensionuar në vend krijon problematika, ndër të tjera edhe të ekonomia.

Sipas kryeministrit, përplasjet e protestuesve me forcat e rendit ndikojnë të investimet e huaja, e sidomos te ato italiane.

Një ndikim tjetër, sipas kreut të qeverisë është edhe te konsumi. Në raste tensionesh, qytetarët janë të prirur të ulin konsumin,  e kjo sipas kryeministrit, krijon ndikim negativ te të gjithë, përtej bindjeve politike.

“Në këto kushte njerëzit janë të prirur të konsumojnë më pak. Është një luleshitëse që e njoh prej 30 vitesh. U futa në dyqanin e saj dhe me tha që është tufa e parë me lule që po shes që nga 16 shkurti. Njerëzit tërhiqen nga shumëçka që është pjesë e nevojave dhe e dëshirave të jetës së tyre kur ndodhin gjëra të tilla dhe krijohet pasiguri dhe nevojë për vetëmbrojtje. Çdo shfaqje e tillë cënon drejtëpërdrejtë konsumin.

Kjo është ajo që u them të gjithë atyre që kanë të drejtë të mos jenë mbështetës të qeverisë sonë por që kanë nevojë që ekonomia ta vazhdojë të rritet, që kur janë të vetëpunësuar të mos cënohet biznesi i tyre. Çfarë zgjidhin me këtë? Asgjë tjetër përveçse cënojnë vetveten. I bien vetes.

Këta kërkojnë atë që kanë kërkuar gjithmonë. Të marrin pushtet në tavolinë.  Kërkojnë atë që nuk mund t’ua japim dot; përmbysjen e rregullave të lojës dhe transformimin e procesit në një proces absurd duke krijuar një precedent të papranueshëm, jo vetëm për ne por për asnjë vend. Si i bëhet. Shumë thjeshtë. Ne vazhdojmë me edhe më shumë vëmendje, me edhe më shumë përkushtim vendosmëri punën tonë. Kemi shumë gjëra për të bërë e korrigjuar.

Ne jemi të gatshëm të flasim në çdo moment. Dora jonë është e shtrirë. Gatishmëria për të folur është gjithmonë. Jemi gati të dialogojmë për gjithçka por nuk jemi dhe nuk do të jemi që të negociojmë rregullat themelore që bëjnë ndryshimin mes këtij sistemi ku njerëzit zgjedhin dhe te zgjedhurit respektojnë mandatet” tha kryeministri.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.