Optimizëm për Greqinë – Moody’s rrit vlerësimin me 2 nota në B3, pret dalje të “pastër” në Gusht
Agjencia Moody’s ka rritur vlerësimin për Greqinë me 2 nota këtë javë, apo në B3 nga Caa2, duke theksuar se vendi do të përfundojë me sukses programin e tretë të ndihmave këtë verë dhe do të rifitojë aksesin për t’u financuar në tregje.
Greqia mori gjithashtu një perspektivë pozitive. Agjencia e vlerësimit bëri të ditur se vendi ka arritur përmirësime fiskale dhe institucionale nën programin e shpëtimit dhe argumenton se kjo situatë do të jetë e qëndrueshme në vitet e ardhshme.
Këto arritje do të mbështesin rimëkëmbjen e ekonomisë si dhe përmirësimin e sektorit bankar.
“Dalja e pastër do të mbështetet në terma afat-shkurtër nga mbrojtësit shtesë me para dhe në afat-mesëm nëpërmjet angazhimeve të forta të kreditorëve për të ofruar lehtësim të mëtejshëm të borxhit”, bëri të ditur agjencia.
Sipas Moody’s, rreziku i një falimentimi tjetër apo ristrukturimit të borxhit të mbajtur nga investitorët privatë ka rënë.
Ndërkohë që vendi ka qenë në të njëjtat rrethana në mesin e 2014-ës, sipas Moody’s, rreziku i përmbysjes së progresit ekonomik dhe fiskal është materialisht më i ulët.
Agjencia deklaroi se mund të rrisë më tej vlerësimin për vendin nëse reformat e programit të shpëtimit japin rezultate më pozitive se sa pritej, gjë që mund të japë kontribut më të madh ekonomik dhe rënie më të shpejtë të borxhit publik.
Optimizmi për Greqinë është reflektuar edhe nga agjencia tjetër “Fitch Ratings”, që rriti vlerësimin në B nga B-, prej përmirësimit të ekonomisë dhe suficitit buxhetor.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.