Organizatorët e protestës çeke bëjnë thirrje për një lëvizje të re politike pas shembullit të së dielës në Pragë
Organizatorët e një demonstrimi masiv që bëri thirrje për dorëheqjen e kryeministrit çek, thanë se shpresojnë që një lëvizje e re politike të dalë nga këto protesta. Grupi Miliona Momente për Demokraci, po bën thirrje që Andrej Babis të dorëhiqet pas akuzave për përdorim të pushtetit të tij si Kryeministër për të rritur interesat e biznesit të tij. Por ndërsa vetë grupi duhet të qëndrojë larg organizimit politik, organizatori i protestës, Benjamin Roll, tha se ishte mungesa e zgjedhjes në horizontin politik që i mundësoi Babisit të mbajë pushtetin deri më sot.
“Shumë njerëz nuk shohin një alternativë tjetër,” tha ai në emisionin Good Morning Europe. “Ata mendojnë ‘Po, ai nuk është aq i mirë, por nuk shohim dikë tjetër më të mirë’. Shpresoj që ky demonstrim dhe protestat tona të mund të krijojnë një mjedis nga i cili mund të krijohet diçka e re. Disa udhëheqës të rinj politikë, një lëvizje e re politike. Por ne do të qëndrojmë një lëvizje që do të mbetet e shoqërisë civile në mënyrë strikte.”
“Problemi më i madh është se ai zotëron shtëpinë më të madhe mediatike në Republikën Çeke, kështu që ai ka një ndikim të madh në publik. Ai pretendon se ne paguhemi nga kush e di kush dhe që duam avantazhe për veten tonë dhe para. Kjo funksionon për shumicën e njerëzve në vendin tonë, të cilët thonë se ‘janë nga Praga, atëherë ata paguhen nga dikush nga jashtë’, gjë që nuk është e vërtetë, sepse protestuesit po paguajnë për të organizuar këtë ngjarje “, tha ai gjatë intervistës.
“Mund të flasim për një ndryshim të gjeneratave, por mendoj se është e rëndësishme të thuhet se protesta nuk ishte vetëm për të rinjtë. Kishte njerëz nga të gjitha brezat, kishte shumë njerëz të moshuar, kishte shumë familje. Por unë mendoj se është e rëndësishme që gjenerata e re të udhëheqë protestat dhe shumica e njerëzve janë nga një brez i ri. Diçka po ndryshon në të menduarit e njerëzve dhe kjo është me të vërtetë e rëndësishme për shoqërinë tonë”, u shpreh Roll.
Burimi: Euronews
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.