Organizuan sulmin në parlament – Burg deri në gjashtë vjet e gjysmë për 4 ish udhëheqës në Maqedoninë e Veriut
Katër ish zyrtarë të lartë janë dënuar për organizimin e sulmeve në parlamentin e Maqedonisë së Veriut në 2017.
Ish kryetari i parlamentit, dy ish ministra dhe ish shefi i inteligjencës së vendit u dënuan deri në gjashtë vjet e gjysmë burg.
Disa deputetë të Maqedonisë së Veriut, përfshirë kryeministrin aktual Zoran Zaev, u rrahën rëndë kur protestuesit nacionalistë sulmuan parlamentin në prill 2017.
Demonstruesit, mbështetës të Nikolla Gruevski dhe partisë së tij të djathtë VMRO-DPMNE donin të parandalonin Social Demokratët që të formonin një qeveri koalicioni me grupet e pakicave shqiptare.
Protestuesit u mblodhën kundër zgjedhjes së një drejtuesi të ri dhe akuzuan partinë Socialiste të opozitës së atëhershme për kërcënimin e unitetit kombëtar të Maqedonisë së Veriut.
Një gjykatë në Shkup tha se katër të pandehurit kishin “organizuar dhe mbështetur materialisht demonstratat masive që arritën kulmin në një ndërhyrje të dhunshme në parlament”.
Ish kryetari i parlamentit Trajko Veljanoski u dënua për kërcënim të rendit kushtetues dhe u dënua me gjashtë vjet e gjysmë burg për rolin e tij në dhunë. Para sulmit në parlament, ai e kishte zgjatur qëllimisht seancën për të lejuar protestuesit të mblidheshin jashtë.
Ish-ministrat Mile Janakievski dhe Spiro Ristovski u dënuan me gjashtë vjet e tre muaj për drejtimin e demonstruesve.
Ndërkohë ish-drejtori i shërbimit sekret Vladimir Atanasovski, i akuzuar si nxitës i drejtpërdrejtë i dhunës dhe urdhëruesi i një makine plot me armë të parkuar jashtë parlamentit, u dënua me gjashtë vjet burg.
Gruevski qeverisi Maqedoninë e Veriut për një dekadë para se të rrëzohej nga një krizë politike në 2016. Ish-udhëheqësi i cili iku në Hungari në 2018 për t’i shpëtuar një akuze korrupsioni gjithashtu u akuzua për nxitjen e sulmit në parlament.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.