Ose Kina ose NATO – Të gjithë kundër Huawei, Pelosi dhe Trump bashkojnë forcat në luftën për epërsinë e 5G
Ose Huawei-n ose NATO-n, që do të thotë ose rrjetet 5G të siguruara nga ndërmarrjet kineze ose aleancën ushtarake dhe të inteligjencës me Shtetet e Bashkuara. Pas një viti e gjysmë debatesh dhe diskutimesh drejtuar partnerëve europianë, gjatë konferencës së 56-të të sigurisë në Mynih, Shtetet e Bashkuara kaluan në paralajmërime serioze gati në kërcënime të mirëfillta. Dhe lajmi është se për herë të parë ky veprim po bëhet në mënyrë bipartizane.
Demokratët dhe republikanët janë të ndarë mbi gjithçka, nga impeachment tek ekonomia, nga kujdesi shëndetësor deri tek emigracioni, por kur bëhet fjalë për sigurinë kombëtare të gjithë rreshtohen në të njëjtin drejtim.
Me një delegacion të madh, më të shumtë se zakonisht sipas ekspertëve pasi ky është një vit zgjedhor, zyrtarët amerikanë janë përpjekur të paralajmërojnë 35 kokat e shtetit, 100 ministrat e jashtëm dhe të mbrojtjes, si dhe drejtuesit e organizatave ekonomike dhe ndërkombëtare, të mbledhur në takimin tre-ditor bavarez mbi rrezikun strategjik të kontraktimit të kompanive kineze për ndërtimin e qelizave dhe antenave për rrjetin e gjeneratës së pestë.
Pranimi i dominimit kinez mbi 5G do të ishte “zgjedhja e autokracisë mbi demokracinë. Kjo është autostrada e informacionit e ditëve tona, pse duhet t’i licencojmë kinezët të drejtojnë trafikun? Nuk duhet të jetë një ‘kinezizim’ i kësaj autostradë informacioni, por një ndërkombëtarizim i tij,” tha kryetarja e Dhomës, Nancy Pelosi.
“Është një çmim shumë i lartë për të paguar në drejtim të sigurisë kombëtare, ekonomisë, vlerave dhe qeverisjes. Dhe kjo është arsyeja pse ka mbështetje dypartiake për këtë pozicion. Nuk është një avantazh ekonomik, është një urgjencë vlerash: autokraci kundër demokracisë. Ne zgjedhim demokracinë”, u shpreh ajo. Deklarata e saj është fondamentale sepse konfirmon për aleatët se ky do të jetë pozicioni i Shteteve të Bashkuara edhe nëse demokratët do të ri fitojnë Shtëpinë e Bardhë në nëntor. (LK)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.