OSHEE blen 20 mln euro energji: “6% më pak se sasia e nevojshme, do e marrim nga KESH”
Operatori i Shpërndarjes së Energjisë Elektrike ka mbyllur procedurat për blerjen e energjisë për muajin shtator, ndërkohë që shuma e shpenzuar kap vlerën e 20 milion eurove. Pas mbylljes së negociatave, kompania arriti të blejë 271.620 mwh ose 6% më pak sesa sasia e kërkuar.
Sipas OSHEE, për blerjen e energjisë u negociua me 10 subjekte, nga të cilët 9 u pranuan dhe ndonëse si asnjëherë tjetër, negociatat vazhduan me 5 raunde, nuk u arrit të sigurohej e gjithë sasia. Ndërkohë sasia e kërkuar nga OSHEE ishte 288,600MËh, ndërkohë që pjesa e mbetur do t’i kërkohet Korporatës Elektroenergjetike Shqiptare.
Tre muajt e fundit, situata e energjisë në vend është përkeqësuar për shkak të thatësirës së tejzgjatur, çka bëri që edhe KESH të blejë për shtatorin 115,200 MWh me një çmim mesatar prej 62.33 Euro/MWh.
Ndërkaq, nga OSHEE për periudhën kohore korrik-shtator, janë blerë gjithsej gati 80 milionë euro energji. Sa i takon situatës financiare të kompanisë, operatori i shpërndarjes sqaron se ka likuiditetin e nevojshëm, pasi kompania ka arkëtime prej rreth 5 miliardë lekë në muaj apo 36 milion euro, por problemi qëndron në faktin se gjithçka po përdoret për fondet e energjisë, ndërkohë që kompania duhet të bëjë edhe investime.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.