OSHEE listohet në bursë, Strategjia e energjisë, Rama: Shqiptarët aksionerë në kompani
Operatori i Shpërndarjes së Energjisë Elektrike do të listohet në Bursën Shqiptare, duke iu dhënë mundësi qytetarëve të bëhen pjesë e kompanisë përmes blerjes së aksioneve”. Gjithçka është bërë me dije nga kryeministri, Edi Rama gjatë prezantimit të Strategjisë së re të Energjisë 2018-2030.
“Për tregun e energjisë, ne ndërmorëm një proces kurajoz liberalizmi dhe ku parashikojmë që në harkun e pak viteve të kemi një hapje 100% të tregut të energjisë.
Sot, falë këtij procesi, ne kemi nisur përgatitjet për një tjetër hap shumë të rëndësishëm që besoj do të krijojë një atmosferë të re në marrëdhëniet mes konsumatorëve dhe kompanisë së shpërndarjes së energjisë, por dhe do ta çojë në një shkallë tjetër organizmin e kompanisë, transparencën e punës së kompanisë dhe efikasitetin e saj.
Kemi nisur punën për një IPO dhe shpresojmë që deri në fund të këtij viti të jemi gati t’u ofrojmë qytetarëve shqiptarë mundësinë e pjesëmarrjes si aksionerë në kompaninë e shpërndarjes së energjisë, me ambicien që vitin e ardhshëm, kompania të kthehet në një kompani ku pjesëmarrja masive e qytetarëve si aksionerë do të ketë një benefit reciprok për kompaninë dhe për qytetarët, të cilët do të mund të përfshihen në aksioneratin e kompanisë si kontribuues dhe si përfitues. Këtë nuk do të mund ta imagjinonte askush vetëm pak vite më parë. Ndërkohë që sot, kjo është jo vetëm e mundshme, por ne besojmë fort se është edhe e nevojshme për ta çuar kompaninë në një stad të ri.
Jemi shumë të bindur që liberalizimi i tregut do të sjellë përmirësime të jashtëzakonshme në çdo aspekt të veprimtarisë së sektorit energjetik”.
Sipas ministrit të Infrastrukturës dhe Energjisë, Damian Gjiknuri përgjatë 12 vjeçarit të ardhshëm do të investohen 2.7 miliard euro.
Ndërkaq, sipas përfaqësues së USAID, qeveria shqiptare duhet të tregohet e kujdesshme në dhënien e koncesioneve për ndërtimin e hidrocentraleve.
Strategjia Kombëtare e Energjisë, Gjiknuri: Çfarë synojmë të arrijmë deri në 2030-n
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.