OSHEE zbulon 237 raste të vjedhjes së energjisë – Procedohen 130 shtetas në polici, në kërkim 34 të tjerë

Strukturat e Operatorit të Shpërndarjes së Energjisë nëpërmjet një njoftimi të publikuar në faqen zyrtare kanw bërë me dije se kanë identifikuar 237 raste të vjedhjes së energjisë elektrike në mbarë vendin.

Në një aksion të përbashkët me OSHEE, policia e shtetit, arrestoi në flagrancë rreth 58 abonentë, të denoncuar për veprën penale të vjedhjes së energjisë elektrike.

Nga ky aksion policia procedoi penalisht 130 shtetas dhe janë shpallur në kërkim 34 shtetas të tjerë.

Gjithashtu janë proceduar penalisht 4 punonjës të OSHEE-së, për “Shpërdorim detyre”.

Në një dalje për mediat, policia e shtetit njoftoi se pas denoncimit nga punonjësit e OSHEE Group, vetëm ditët e fundit, si rezultat i kontrolleve janë evidentuar 48 raste të vjedhjes së energjisë elektrike dhe janë arrestuar në flagrancë 12 shtetas dhe janë proceduar penalisht 33 shtetas, si dhe 3 punonjës të OSHEE-së, për shpërdorim detyre.

Policia e Shtetit ka ftuar qytetarët që të denoncojnë në numrin 112 dhe në Komisariatin Dixhital, çdo rast të paligjshmërisë, duke iu garantuar anonimat të sigurt, reagim të menjëhershëm, profesional e të paanshëm.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.