OSSH kërkon rritjen e çmimit të energjisë – Depoziton aplikimin në ERE, preken bizneset në treg të lirë energjie
Operatori i Sistemit të Shpërndarjes ka aplikuar sërish pranë Entit Rregullator të Energjisë për rritjen e tarifës së shpërndarjes, e cila prek drejtpërdrejt bizneset që kanë dalë në treg të lirë energjie. Sipas aplikimit, OSSH kërkon rritjen në 3.70 lekë/ Kwh të tarifës së shpërndarjes së energjisë elektrike për klientët e lidhur në tensionin 35 kv dhe 4 lekë/ kwh për klientët e lidhur në tensionin 6-20 kv.
Kjo do të thotë që OSSH, në aplikimin e saj ka propozuar një tarifë mesatare të shpërndarjes së energjisë elektrike prej 5.98 lekë/kwh nga 4.79 leke/kwh të miratuar nga ERE për vitin 2015 dhe e mbajtur në fuqi edhe për periudhën 2016 –2020. I njëjti nivel i rritur tarifash u kërkuar edhe për vitin 2020 nga Operator ii Sistemit të Shpërndarjes, por ai u rrëzua nga Enti Rregullator i Energjisë, që nuk pranoi të niste procedurën për shqyrtimin e aplikimit.
Në vendimin e saj, ERE argumentoi se në kushtet e pandemisë COVID-19, procesi i konsulitimit me palët e interesuara nuk ishte i mundur, ndërkohë që OSSH nuk mundi të paraqesë informacionin e kërkuar në mënyrë të vazhdueshme nga ana e ERE, lidhur me realizimin e treguesve tekniko-ekonomikë dhe financiarë të shoqërive përgjatë vitit 2020.
Rritja e tarifës së shpërndarjes do të ndikonte në çmimin fundor të energjisë për bizneset e dalë në treg të lirë energjie, pasi çmimi final reflekton edhe tarifën e OSSH-së, si një detyrim për shkak të përdorimit të linjave që normalisht menaxhohen nga ky dikaster. Për këtë arsye, gjatë konsultimeve të zhvilluara në muajin shkurt të vitit të kaluar me grupet e interesit, bizneset argumentuan se kjo tarifë e rritur do të ndikonte në uljen e konkurrueshmërisë jo vetëm në tregun shqiptar, por edhe në drejtim të eksporteve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.