Pa kualifikim profesional por me mundësi punësimi në Europë – Çfarë është ALMA, programi i BE-së për rininë?!

Pa kualifikim profesional dhe pa punë, por me mundësi për të punuar diku në Europë si në Spanjë, Itali apo në Poloni, këtë synon ta bëjë të mundshme Komisioni i BE-së përmes “ALMA” programit të shkëmbimi për të rinjtë.

Rinia duhet të ketë mundësinë të fitojë përvojë pune jashtë vendit. Qëllimi i programit ALMA është që t’i krijohen mundësi rinisë për t’u punësuar dhe për të fituar përvoja përmes shkëmbimit brenda vendeve të BE-së. Komisioni i BE-së ende nuk ka bërë të ditura detajet për programin dhe se cilat grup-moshe nga brezi i ri do të përfshihen në të.

Sidoqoftë viti 2022 do të shpallet si viti i rinisë. Me këtë synohet që të vlerësohet rinia, e cila në kushtet e pandemisë ka vuajtur pasojat e masave kufizuese. Në fjalën e saj në Strasburg së fundi për gjendjen e unionit presidentja e Komisionit të BE-së, Ursula von der Leyen, theksoi, se rinia meriton më shumë dhe duhet të dëgjohet zëri i saj.

Kjo është arsyeja përse Brukseli është i interesuar të verë në jetë programin “ALMA”, që do të thotë: Aim, Learn, Master, Achieve. Të rinjtë pa zanat dhe të papunë do të kenë mundësinë të kryejnë kurse arsimimi ose të gjejnë një punë duke udhëtuar në vendet e BE-së për të fituar eksperiencë.

Pjesëmarrësit në këtë program do të përfitojnë një asistencë për të përballuar shpenzimet e udhëtimit, të akomodimit dhe për të mbuluar të tjera nevoja bazike gjatë periudhës që janë jashtë vendit të tyre. Ata do të marrin një trajnim përpara, gjatë dhe pas zhvendosjes në një vend tjetër.

Ndonëse skema e programit ende nuk është përfunduar në detaje, por është në fazën e zhvillimit, kompani të ndryshme kanë shprehur interesin për të marrë pjesë në të. Një fond i parashikuar prej 15 milionë Eurosh do të vihet në dispozicion nga BE-ja për vitin e parë të programit “ALMA”.

Deutsche Welle

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.