Pa rrip sigurimi e të mbingarkuar, Policia bllokon 21 fugonë shkollash! Apeli: Prindër, kujdes fëmijët! Po vini në rrezik jetën e tyre
Prej një jave Policia Rrugore e Drejtorisë Vendore të Policisë Tiranë, po vijon punën për kontrollin e automjeteve të shërbimit publik, që transportojnë fëmijë në shkolla e kopshte.
Policia njofton se kontrolli ka konsistuar në drejtim të dokumentacionit, kryesisht të kontrollit teknik të këtyre automjeteve , si dhe në drejtim të zbatimit me përpikmëri të rregullave të transportit të fëmijëve.
Këto kontrolle kanë për qëllim rritjen e sigurisë së jetës të fëmijëve që qarkullojnë me këto automjete.
“Gjatë kontrolleve të ushtruara gjatë kësaj jave, Policia Rrugore e Tiranës ka konstatuar një sërë shkeljesh në drejtim të kontrollit teknik të automjeteve, si dhe në drejtim të transportimit të fëmijëve, duke mos vendosur rripin e sigurimit fëmijëve, apo jashtë vendeve të lejuara, duke transportuar më shumë fëmijë sesa i lejohet. Në këtë kuadër, bazuar në shkeljet e evidentuara, gjatë kësaj jave janë dërguar në OASH, 21 drejtues të këtyre automjeteve për këto lloj shkeljesh” njofton Policia.
Në vijim të njoftimit, Policia Rrugore e Tiranës kërkon mirëkuptimin dhe bashkëpunimin e prindërve në këtë drejtim, që ata të mos pranojnë që fëmijët e tyre të transportohen jashtë kushteve teknike duke vënë në rrezik jetën e tyre.
Policia Rrugore në të gjitha qytetet dhe njësitë administrative në të gjithë vendin do vijojë kontrollin e pandërprerë në këtë drejtim, deri në plotësimin e kushteve teknike për transportin e sigurt të fëmijëve.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.