“Pa standarde nuk do të ketë financim”, Peleshi: Së shpejti nis aksioni ndaj baxhove
“Nuk do të ketë financim dhe mbështetje financiare pa arritjen e standardeve ushqimore”. Ministri i Bujqësisë Niko Peleshi i bën thirrje të gjithë bizneseve që operojnë në këtë fushë të marrin përgjegjësitë dhe të plotësojnë kriteret e vendosura.
Ministri tha se pas aksionit për thertoret jashtë standardeve, do të nis shumë shpejt edhe një aksion tjetër për inspektimin e baxhove apo fabrikave të përpunimit të qumështit.
“Shumë shpejt do të fillojmë me qumështin dhe përpunimin e qumështit. Kontrolli do të jetë shumë i fortë. Edhe mënyra, sesi do të mblidhet qumështi te fermerët do të jetë gjithashtu shumë strikte. Jo me kova plastike, edhe më gjithë lloje mënyrash, sesi bëhen tani. Duhet të merret vetëm nga lopët, që janë të kontrolluara nga një veteriner, që ka një pasaportë të kontrollit, që kanë matrikullim. Transporti duhet të bëhet sipas standardeve ligjore, me tanke inoksi etj”.
Peleshi tha se mbështetja financiare do të jetë dyfish më e lartë krahasuar me të kaluarën, por kushti kryesor është arritja e standardeve.
“Nevoja për të rritur investimin do të mbështetet nga Qeveria për të gjithë bizneset, sidomos të fushës të sigurisë ushqimore, por në përgjithësi, bujqësia edhe blegtoria, do mbështeten këtë vit me më shumë fonde. Fondi përmes AZHBR–së, i mbështetjes financiare do të jetë pothuajse dyfish krahasuar me të kaluarën. Janë 2.6 miliard lekë. Kështu që kërkesat tuaja, për të marrë financim për projektin e ri, të zgjerimit të kësaj fabrike të përpunimit të qumështit, nga ne natyrisht, që i ka të gjitha shanset, për të marrë përgjigje pozitive, të mbështetet, sipas kushteve dhe kritereve të Agjencisë të Zhvillimit Bujqësor dhe Rural, por duhet ta theksoj nevojën për të vendosur standarde të larta të sigurisë ushqimore.”
Deklaratat e ministrit u bënë gjatë vizitës të një baxho në Dibër.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.