Pa tatim-fitim dhe TVSH deri në vitin 2029, Rama: “Lehtësimi për biznesin e vogël përkthehet në më shumë para për familjet”
Kryeministri Edi Rama, së bashku me ministren e Ekonomisë dhe Financave, Anila Denaj dhe me ministrin për Rindërtimin, Arben Ahmetaj, dolën në një konferencë për mediat për të bërë një përmbledhje mbi lehtësitë fiskale që janë ofruar për biznesin në vend. Sipas kreut të qeverisë, ligji për heqjen e tatim-fitimit për bizneset me qarkullim deri në 14 milionë lekë dhe heqja e TVSH-së për bizneset me qarkullim deri në 10 milionë lekë, i cili do të jetë në fuqi deri në vitin 2029, përkthehet në më shumë para për këtë kategori.
“Sot kemi kaluar me mbështetjen e shumicës parlamentare në Kuvend një masë shumë agresive mbështetjeje. Një masë e cila është unikale në rajonin tonë dhe përkon me zotimin tonë për ta mbështetur fuqimisht çdo kënd që krijon punë për veten dhe familje dhe krijon punë dhe për të tërë dhe që bëhet pjesë e komunitetit të biznesit të vogël”, u shpreh z. Rama.
Sot me vendim të Kuvendit të Shqipërisë, qysh në muajin korrik bizneset e vogla të cilat kryejnë një xhiro deri në 14 milionë lekë të reja nuk paguajnë asnjë tatim fitimi, zero. Ndërsa edhe më tutje, bizneset e vogla që kryejnë një xhiro deri në 10 milionë lekë të reja nuk paguajnë as TVSH”, shtoi kreu i qeverisë.
Ndërsa sipas ministres së Financave dhe Ekonomisë Anila Denaj, lehtësimi i barrës fiskale për biznesin e vogël ka qënë në fokus gjatë gjithë qeverisjes së Partisë Socialiste.
“Më lejoni të theksoj përpjekjen e madhe që është bërë në gjithë këto vite për të formalizuar biznesin e vogël dhe ekonominë në përgjithësi. Më herët në raport me pragun e TVSH-së, është diskutuar pafund rreth faktit se pse u ul pragu i TVSH-së. Sigurisht, për një periudhë të caktuar ky prag shkoi në 2 milionë lekë, por le të mos harrojë që u formalizuan rreth 30.000 biznese dhe formalizimi i ekonomisë ishte dhe mbetet një prioritet i qeverisë socialiste. Sot kemi një numër të regjistruar biznesesh me 50% më shumë çdo vit sesa para vitit 2013”, u shpreh Denaj.
Edhe ministri për Rindërtimin, Arben Ahmetaj, ishte në të njëjtën linjë me pasardhësen e tij në krye të financave.
”Biznesi i vogël është ndihmuar me ulje të procedurave, barrës fiskale, dhe është konkretizuar me rritjen e fitimit. 16.8 milionë dollarë- 40 milionë dollarë është rritur fitimi i tatueshëm.
Janë mbështetur nga dy paketat pa përfshirë paketën e papunësisë dhe ndihmës ekonomike, pa to, vetëm me paketa direkte, 237 mijë qytetarë, individë që kanë pësuar humbje të të ardhurave. Politika sociale që kalonin vështirësi prej pandemisë, ka rezultuar me sukses. Pavarësisht cinizmit. Dhe praktikisht në korrik dhe gusht patëm rritje të konsumit duke u reflektuar tek rritja e TVSH.” – u shpreh z.Ahmetaj
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.