“Padrejtësia me vaksinat, ndasi e tmerrshme” / Tedros: Bota po hyn në fazën fillestare të valës tjetër të infektimeve

Organizata Botërore e Shëndetësisë paralajmëron se bota po hyn në fazën fillestare të valës tjetër të infektimeve dhe vdekjeve nga Covid-19. Duke folur përpara anëtarëve të Komitetit Olimpik Ndërkombëtar në Tokio, Drejtori i Përgjithshëm i OBSH-së, Tedros Adhanom Ghebreyesus, deklaroi se dështimi global për të ndarë vaksinat, testet dhe trajtimet edhe me vendet e varfëra ka krijuar një pandemi me dy korsi. Vendet që kanë mjaftueshëm vaksina janë hapur tashmë, ndërsa vendet e tjera, kryesisht të varfëra, po qëndrojnë të mbyllura në përpjekje për të parandaluar përhapjen e virusit. “Padrejtësia me vaksinat në të gjithë botën po krijon një ndasi të tmerrshme”, deklaroi drejtori i OBSH. Sipas tij, 75% e dozave të vaksinave, apo më shumë se 3.5 miliardë doza, janë administruar në vetëm 10 vende, ndërsa vetëm 1% e njerëzve në vendet e varfëra kanë marrë të paktën 1 dozë. Tedros paralajmëroi se 19 muaj pas fillimit të pandemisë dhe 7 muaj pas aprovimit të vaksinës së parë, bota gjendet në fazën e parë të një vale tjetër infektimesh dhe vdekjesh, duke shtuar se kërcënimi global nga pandemia do të jetë prezent derisa të gjitha vendet ta trajtojnë sëmundjen. Lojërat Olimpike të Tokios pritet të fillojnë të premten, ndërkohë që u shtynë me një vit për shkak të pandemisë. Por, rastet në rritje në Tokio e kanë lënë olimpiadën nën hije, pasi autoritetet ndaluan spektatorët të marrin pjesë pas vendimit të qeverisë në Japoni për të deklaruar gjenden e emergjencës. Rasti i parë pozitiv me Covid-19 u zbulua në fshatin olimpik gjatë fundjavës, ndërsa deri më tani janë evidentuar më shumë se 70 raste të lidhura me Lojërat Olimpike të Tokios. Gjatë fjalës së tij, Tedros deklaroi se Lojërat janë një festë për të cilët bota ka nevojë tani, më shumë se kurrë.

Lidion Kulla – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.