Paga minimale më e ulët në Europë, Eurostat: Shqipëria e fundit me 210 euro në muaj, Bullgaria ndjek me 286 euro
Shqipëria është vendi që ka pagën minimale më të ulët në Europë. Këtë gjë e fakton Eurostat me publikimin më të fundit mbi pagat minimale në kontinentin e vjetër. Jo të gjitha vendet e kanë me ligj pagën minimale, dhe vendosja e saj është një debat i kahershëm mes politikbërësve.
Gjithsesi, pjesa dërrmuese e kanë, dhe Shqipëria është një prej tyre. Pavarësisht ndryshimit më të fundit të nivelit të pagës minimale mujore në vend, nga 24 mijë në 26 mijë lekë, Shqipëria vijon të jetë e fundit.
Sipas Eurostat, në vendin tonë, paga minimale mujore në 2019 fiksohet në 210 euro në muaj. Europa ndahet si me thikë në drejtim të pagës minimale, pasi pjesa lindore në pjesën më të madhe e ka këtë shifër nën 600 euro në muaj, ndërsa ajo perëndimore, kryesisht, mbi 1000 euro në muaj.
Në Bashkimin Europian, Bullgaria është në vend të fundit, me 286 euro në muaj. Bullgaria është edhe e parafundit në Europë, duke lënë pas vetëm vendin tonë. E treta nga fundi ndërkohë është Serbia me 308 euro në muaj, e ndjekur nga Turqia me 422 euro dhe Letonia me 430 euro në muaj.
Nga krahu i kundërt i tabelës është Luksemburgu me rreth 2000 euro në muaj, i ndjekur nga Irlanda dhe Holanda me pak më shumë se 1600 euro në muaj.
Gjithsesi, të dhënat i referohen vetëm atyre shteteve të marra në analizë nga Eurostat, pasi një pjesë tjetër e vendeve europiane por edhe rajonale kanë një pagë minimale më të ulët se vendi jonë, por që nuk figurojnë në të dhënat e Agjencisë Europiane të Statistikave.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.