Pagat e artistëve – 53 mijë deri në 84 mijë lekë. Ibrahimi: S’ka rritje që prej 2014-ës
53 mijë deri ne 84 mijë lekë janë pagat që paguhen artistët në vendin tonë sipas kategorive.
Bazuar në të dhënat e siguruara nga Televizioni SCAN rezulton se në Teatrin Kombëtar Aktorët në kategorinë e parë paguhen me 84.7, kategoria e dytë 75 dhe e tretë 62 mijë lekë.
Ndërsa në Teatrin e Operas dhe Baletit dirigjenti i Operas dhe filarmonisë, dirigjenti i orkestrës, baletit, regjisori, solisti i parë, koncertmaestër dhe baletmaestër janë ata që paguhen më shumë me 84.7 mijë lekë, ndjekur nga solisti i dytë 78 mijë lekë dhe asistent dirigjenti asistent regjisor orkestrant i kategorisë së parë dhe dirigjent kori me 75 mijë lekë.
Ndërsa mjeshtër i numrave të cirkut dhe mjeshtër i profilit të numrave të cirkut paguhen me 64 mijë lekë.
53 mijë lekë paguhet solisti i dytë, skenograf i kategorisë së dytë orkestranti i kategorisë së trete valltar dhe korist i kategorisë së tretë.
Por edhe pse ka pasur vazhdimisht kërkesa nga ana e aktorëve dhe sindikatës së pavarur të artistëve për rritje të pagës, nuk rezulton ndonjë ndryshim që prej vitit 2014 kur u lidhën kontratat e fundit.
Kreu i kësaj Sindikate, Reshat Ibrahimi shprehet për televizionin SCAN se do i drejtohen sërish Ministrisë së Kulturës me kërkesën për rritje pagash.
Sipas tij i vetmi vit kur ka pasur rritje të konsiderueshme ka qenë viti 2006 me 100% dhe në 2007-2013 me 10%.
Ndërkohë, në 5 vitet e fundit rritja ka vijuar vetëm me 5% që sipas Ibrahimit nuk reflekton në rritje pasi 5% është indeksimi i inflacionit.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.