Pagat e stafeve akademike/Rektorët: Mbulohen vetëm 10 muaj, MASR: Plotësoni vetë boshllëkun

Fondi për mësimdhënien nuk garanton as vitin e ardhshëm pagat e punonjësve në universitete për 12 muajt e vitit.

Këtë shqetësim rektorët e universiteteve publike e kanë ngritur në komisionin parlamentar të edukimit dhe mjeteve të informimit publik, gjatë diskutimit të buxhetit për vitin 2019.

Dy rektorët, ai  i UT Mynyr Koni dhe ai i Mjekësisë, Arben Gjata kërkuan veç  financimit 100% të pagave për stafin akademik dhe fondin për kërkimin shkencor për çeljen e projekteve për shkollat e doktoraturës.

Për Drejtoreshën e Financave  në Ministrinë e Arsimit Mirela Bimo, fondi për pagat   nuk do të ndryshojë por do të shihen raportet në universitete mes stafit akademik dhe atij ndihmës i cili është i fryrë.

Nevojat për fondin e mësimdhënies në universitete publike është 13 miliard lekë ndërkohë që ministria arrin të mbuloj vetëm 8.1 miliard lekë.

Shpërndarja e këtij fondi është e ndryshme për çdo universitet duke u bazuar në një sërë faktorësh, siç janë numri i studentëve apo edhe të ardhurat e universitetit.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.