Pagat për administratën, Ahmetaj: Rritja mesatare rreth 10 %
Ministri i Financave në një deklaratë për mediat ka bërë publike edhe një herë rritjen e pagave për administratën publike. Sipas Ahmetajt, rritja mesatare e pagave llogaritet me 10 për qind.
“Paga për mësuesit në sistemin parauniversitar është rritur me 10 për qind. Baza e mësuesit për shkollat e mesme rritet me 3500 lekë, paga bruto shkon në 64 650 lekë. Nga ky vendim përfitojnë 31 370 punonjës të sistemit arsimor me efekt 1.3 miliard lekë për periudhën 12 mujore. Ky është Fondi më i madh i rritjes së pagave dhe pensioneve në 25 vjet i akorduar nga buxheti i shtetit. Duke filluar nga sot është jetësuar rritja e pagave mesatarisht 10% për punonjësit e administratës publike dhe nëpunësit civil, aparatet e Ministrive të linjës, administratën e Presidentit, Kuvendit, KQZ, Gjykatës së Lartë, Prokurorisë së Përgjithshme. Rriten pagat për diplomatët me 10 për qind dhe për vendorët me 7 për qind. 3500 profesorë dhe akademikë, rritje page nga 10-12% ” u shpreh Ahmetaj.
Ministri i Financave tha gjithashtu se rritja e pagave llogaritet me 10 për qind edhe për sistemin shëndetësor.
“ Vendimi i sotëm është një shprehje e një realiteti të ri të patjetërsueshëm për shkak të reformave të ndërmarra, si pasojë e konsolidimit të rritjes ekonomike, si shprehje e mbështetjes dhe mirënjohjes sonë si qeveri. Rritja e pagave është një shprehje e solidaritetit të kësaj qeverie” theksoi ministri i Financave Arben Ahmetaj.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.