Pagesa e kontributeve të sigurimeve në sektorin privat – DPT: Penalizime për tatimpaguesit që nuk deklarojnë punonjësit
Të gjithë tatimpaguesit që punësojnë punonjës të rinj, duhet t’i deklarojnë ata të paktën një ditë kalendarike para fillimit të punës. Informacioni mbi marrëdhëniet e punësimit dhe pagesën e kontributeve u publikua sot nga Drejtoria e Përgjithshme e Tatimeve, në rubrikën ‘Tatimet Këshillojnë’.
Lidhur me kontributin e detyrueshëm për të punësuarit me kontratë pune, që zgjat më pak se 87 orë në muaj, sipas DPT-së duhet të jetë:
a) për sigurimet shoqërore, 23.3% të pagës bruto, sipas listëpagesës, ku pjesa e punëdhënësit të jetë 13.9% dhe pjesa e të punësuarit 9.4%, por jo më pak se paga minimale dhe jo më shumë se paga maksimale, e përcaktuar në këtë vendim, për efekt të llogaritjes së kontributeve shoqërore;
b) për sigurimin e kujdesit shëndetësor, 3.4% të pagës bruto, sipas listëpagesës, ku pjesa e punëdhënësit të jetë 1.7% dhe pjesa e të punësuarit 1.7%, por jo më pak se paga minimale e përcaktuar në vendim, për efekt të llogaritjes së kontributeve të sigurimit të kujdesit shëndetësor.
Ndërsa, në rastin kur zgjat më shumë se 87 orë në muaj, duhet të jetë:
a) për sigurimet shoqërore, 23.3% të pagës bruto, sipas listëpagesës, ku pjesa e punëdhënësit të jetë 13.9% dhe pjesa e të punësuarit 9.4%, por jo më pak se paga minimale dhe jo më shumë se paga maksimale, e përcaktuar në këtë vendim, për efekt të llogaritjes së kontributeve shoqërore;
b) për sigurimin e kujdesit shëndetësor, 3.4% të pagës bruto, sipas listëpagesës, ku pjesa e punëdhënësit të jetë 1.7% dhe pjesa e të punësuarit 1.7%, por jo më pak se paga minimale e përcaktuar në vendim, për efekt të llogaritjes së kontributeve të sigurimit të kujdesit shëndetësor.
Ndërkohë, paga minimale për efekt të llogaritjes së kontributeve të sigurimeve shoqërore dhe shëndetësore është 24 000 lekë/muaj. Po ashtu, DPT thekson se ligji nuk parashikon në asnjë rast marrjen e punonjësve në periudhë prove.
Ndërsa sa i takon kontributit të detyrueshëm për nxënësit e shkollave, të mesme apo profesionale dhe studentët, për kohën e programuar të praktikës mësimore të jetë:
Kontributi i detyrueshëm për aksidente në punë dhe sëmundje profesionale të jetë 0.3% e pagës bruto minimale, e barabartë me 66 (gjashtëdhjetë e gjashtë) lekë në muaj.
Kontributet paguhen nga subjekti ku kryhet praktika dhe për aq kohë sa është përcaktuar në kontratën e lidhur ndërmjet tij dhe institucionit përgjegjës ose nga institucioni përgjegjës.
Në rast se gjatë kontrollit të Administratës Tatimore rezulton se tatimpaguesi nuk ka deklaruar çdo punonjës, sipas DPT-së do të ketë penalizime, të cilat parashikojnë penalitet 200 000 lekë nëse është biznes i madh dhe 50 000 nëse është tatimpagues i biznesit të vogël.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.