Pagesa e papunësisë, 12 mijë lekë në muaj – Kush kualifikohet, rastet kur përfitohet më tepër
Qeveria ka miratuar sot programin e pagesës së papunësisë. Ajo do të jetë 50% e pagës minimale, pra në vlerën e 120 mijë lekëve të vjetra. Për të përfituar nga kjo pagesë, duhet që individët të kenë qenë të siguruar dhe kjo do të bëhet në varësi të periudhës së kontributit në sigurimet shoqërore.
Më konkretisht, pagesa do të jepet për:
- 3 (tre) muaj, për personat me një periudhë kontributi, të paktën, 1 vit;
- 6 (gjashtë) muaj, për personat me një periudhë kontributi, të paktën, 3 vjet;
- 9 (nëntë) muaj, për personat me një periudhë kontributi, të paktën, 5 vjet;
- 12 (dymbëdhjetë) muaj, për personat me një periudhë kontributi mbi 10 vjet;
Personat gra mbi 55 vjeç dhe burra mbi 60 vjeç përfitojnë pagesë papunësie 12 muaj, me kusht që të kenë kontribuar 1 vit në sigurimet shoqërore, për çdo rast përfitimi.
Personat që ndërpresin aktivitetin si punëdhënës dhe të vetëpunësuar, largohen nga puna me dëshirën e tyre dhe plotësojnë kriteret për pension pleqërie, invaliditeti apo familjar, paaftësi të përkohshme pune apo sëmundje profesionale nuk do të përfitojnë nga kjo pagesë.
Po ashtu, duhet që personat të cilët punësohen apo vetëpunësohen, kanë ndryshime në gjendjen familjare apo personat që ka në ngarkim të tij kanë mbushur moshën 18 vjeç dhe ata që studiojnë apo janë të paaftë (KMCAP) kanë mbushur moshën 25 vjeç të njoftojnë brena 5 ditëve zyrën e punësimit.
Më tej, sipas vendimit personat, të cilët plotësojnë kushtet për përfitimin e së ardhurës nga papunësia, kanë të drejtë të marrin të ardhura shtesë familjare mbi masën e nivelit bazë, në masën 5% të të ardhurave nga papunësia, për çdo fëmijë në ngarkim, deri në moshën 18 vjeç, si dhe për personat që janë duke vazhduar studimet ose janë të paaftë (KMCAP), deri në moshën 25 vjeç. Shtesa familjare për çdo fëmijë, në masën 5% të nivelit bazë, nuk duhet të jetë më shumë se 30%. Sa i takon rasteve kur prindërit janë të divorcuar me vendim gjykate, shtesën familjare e merr prindi që ka në ngarkim fëmijën.
Ndërkohë, në rastet e punësimit të përkohshëm gjatë periudhës së përfitimit të pagesës së papunësisë, pagesa merret me ndërprerje, konkretisht:
- Brenda 6 muajve, për personat që e përfitojnë pagesën për 3 muaj
- Brenda 12 muajve, për personat që e përfitojnë pagesën për 6 muaj
- Brenda 18 muajve, për personat që e përfitojnë pagesën për 9 muaj
- Brenda 24 muajve, për personat që e përfitojnë pagesën për 12 muaj
Përfituesi i pagesës së papunësisë duhet të paraqitet në zyrën e punësimit një herë në muaj për të konfirmuar prezencën e tij me qëllim punësimin.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.