Pagesa e papunësisë – “Kritere penalizuese”, ulet ndjeshëm fondi i mbështetjes
Vënia në funksionim e skemës së re të përfitimit të pagesës së papunësisë një vit më parë, duket se ka ulur numrin e përfituesve nga kjo mbështetje shtetërore. Kështu referuar të dhënave zyrtare të Ministrisë së Financave, vihet re se shpenzimet buxhetore për 7 mujorin e këtij viti për zërin pagesë papunësie është 220 milion lekë, ose vetëm 28 % e fondit të planifikimit vjetor.
Në të njëjtën periudhë të një viti më parë fondi për pagesën e papunësisë ishte 406 milion lekë, pra një diference e ndjeshme prej 186 milion lekë më shumë. Vitin e kaluar pagesa e papunësisë u rrit me gati 60 për qind, çka do të thotë se nëse më parë një i papunë përfitonte 6850 lekë në muaj, tashmë përfiton 11 mijë lekë në muaj. Por, në fakt të gjithë ata që humbin vendin e punës dhe aplikojnë për pagesën e papunësisë, iu nënshtruan rregullave të tjera të përfitimit, që janë edhe më penalizuese.
Kështu, ata që kanë vetëm një vit të siguruar, u lind e drejta të marrin vetëm tri paga në masën 11 mijë lekë secila. Ata që kanë kontribuar pesë vite, do të marrin 9 paga dhe ata që kanë mbi 10 vite sigurime, do të marrin për 1 vit rresht pagesën e papunësisë. Deri më tani, çdo i papunë, mjaftonte që të kishte kontribuar të paktën 12 muaj dhe përfitonte, 1 vit pagë për herë të parë në masën 6850 lekë në muaj, 10 muaj për herë të dytë, dhe 8 muaj për herë të tretë.
Tashmë duket se kriteret janë forcuar dhe praktikisht është ulur ndjeshëm masa e përfitimit. Gjithashtu kusht për përfitim është regjistrimi pranë zyrave të punës. Pas depozitimit të kërkesës, bëhet edhe plotësimi i dokumentacionit të nevojshëm brenda një afati 60-ditor. Nëse punëkërkuesit të papunë i ofrohet punë dhe e refuzon atë, atëherë automatikisht i hiqet e drejta e përfitimit të pagesës së papunësisë.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.