Pagesa për Rrugën e Kombit – Zusi: Do cenojë rëndë eksportet shqiptare, të ulet

Pagesa për Rrugën e Kombit do të cenojë rëndë kompanitë eksportuese shqiptare, të cilat aksesojnë më së shumti këtë aks”. Deklarata vjen nga kreu i Qendrës së Eksporteve Shqiptare, Alban Zusi, i cili në një prononcim për TV SCAN thotë se kompanitë që do të preken më tepër janë ato që operojnë në fushën e ndërtimit.

Sipas Zusit kjo pagesë është vendosur pa u konsultuar me biznesin, ndërkohë që bën me dije dhe hapat që do të ndërmarrin eksportuesit për uljen e kësaj tarife.

Pagesa për rrugën e Kombit është kundërshtuar nga biznesi edhe përmes protestave, ku rreth 150 kamionë hynë dhe dolën bosh në doganën e Morinës për të paralajmëruar se do të largohen. Aktualisht pagesa për Rrugën e Kombit është duke u testuar, ndërkohë që pas disa ditësh do të nisë aplikimi për çdo automjet. Për mjetet me 3 rrota kjo pagesë do të jetë 2.5 euro, për veturat 5 euro, për autobusët dhe kamionçinat 11.2 euro, për kamionët e mesëm 16.2 euro, ndërsa për kamionët e rëndë 22.5 euro.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.