Pagesat e konsumatorit në Eurozonë – BQE: Varësi e madhe ndaj cash-it, gjermanët janë më konservatorët
Paraja cash vazhdon të dominojë në pagesat e konsumatorëve në Eurozonë, pavarësisht lëvizjeve të shpejta në ekonomitë perëndimore drejt pagesave elektronike, tregon një sondazh i Bankës Qendrore Europiane.
Sipas të dhënave, Eurozona është më e ngadalta ndër ekonomitë e mëdha perëndimore në largimin e parasë fizike, duke mbetur pas vendeve si SHBA, Britania, Australia dhe Kanadaja. Thujase 79% e transaksioneve në pika të shitjes (PoS) janë bërë në cash vitin e kaluar, me normën në Gjermani që arrin në 80%, duke theksuar tensionet e vendit mbi vendimin e Bankës Qendrore Europiane për të hequr nga qarkullimi kartëmonedhën 500 euroshe.
Kjo e fundit u përcaktua si hapi i parë në largimin e parasë cash. Duke përjetuar ngjarje si hiperinflacionin, gjermanët konservatorë varen shumë te paraja fizike, madje edhe në banking preferojnë produkte të thjeshta të kursimit. Nga ana tjetër, 15% e transaksioneve në Suedi bëhen me para fizike, ndërkohë që paraja në qarkullim ka rënë prej vitesh, sipas të dhënave të Riksbank.
Në Eurozonë, Holanda dhe Estonia ka patur përdorimin më të paktë të cash-it vitin e kaluar, me më pak se gjysmën e transaksioneve. Paraja fizike është aq thelbësore në Eurozonë sa që konsumatori mesatar mban 65 euro në portofol, ndërkohë që në Gjermani arrin në 100 euro. Duke theksuar një ndryshues të mundshëm loje, BQE deklaroi se pagesat pa kontakt do të rrisin në mënyrë të shpejtë numrin e transaksioneve elektronike.
Në shitje të tilla, konsumatorët vendosin kartat e tyre apo aparatet celularë pranë terminaleve, duke përfunduar menjëherë blerje në përmasa të vogla, zakonisht pa qenë nevoja e përdorimit të kodit PIN. “Sondazhi sugjeron se shpejtësia në të cilën pagesa të tilla janë përhapur në disa vende, nënkupton se kur pagesat me karta dhe terminalet POS të adaptohen me teknologjinë pa kontakt në shkallë të gjerë, pjesa e pagesave pa kontakt mund të rritet bindshëm”, shkruhet në studim.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.