Pagesat e vonuara në detyrimet kontraktore – Ministria e Financave nxjerr për konsultim projektligjin e ri
Qeveria shqiptare ka vendosur rregulla dhe afate të reja për pagesat e vonuara në detyrimet kontraktore tregtare. Projektligji që përcakton këto ndryshime është hedhur për konsultim dhe synon përafrimin e legjislacionit shqiptar me atë të Bashkimit Europian në kuadër të procesit të integrimit.
Konkretisht, drafti për disa ndryshime në ligjin “Per pagesat e vonuara në detyrimet kontraktuale dhe tregtare”, ka ndryshuar përcaktimin e rregullave për afatet e pagesave te vonuara në rastet e furnizimit me mallra apo shërbime nga ana e ndërmarrjeve tregtare kundrejt autoriteteve publike për rastet specifike sic është rasti i transaksioneve tregtare në fushën e shëndetësisë duke e ndryshuar afatin e pagesës nga 1 vit kalendarik në 60 ditë kalendarike.
Në relacionin shoqërues shpjegohet se Ministria e Shëndetësisë raporton se detyrimet kontraktuale janë përmbushur në masën 98% dhe pagesat e mbetura janë realizuar brenda vitit, ndërkohë që Bashkimi i Dhomave të Tregtisë dhe Industrisë, raporton se asnjë sipërmarrje nuk është mbyllur për shkak të vonesave në pagesa dhe se asnjë prej tyre nuk ka humbur punonjës për shkak të pagesave të vonuara.
Sipas relacionit, duke marrë për bazë rëndësinë që ka shërbimi i kujdesit shëndetësor, dhe vetë situatën financiare në të cilën ai ndodhet duhet të parashikohen edhe rastet e kryerjes së pagesave me vonesë nga ana e autoriteteve që veprojnë në këtë sektor. Ky draft nuk parashikon efekte financiare në buxhetin e shtetit.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.