Pagesë minimale në masë – Kontrollohen 291 mijë vende pune, shërbimet në “shënjestër”

Mbi 291 mijë vende pune janë inspektuar gjatë vitit 2018 në subjekte private dhe shtetërore, ku ka rezultuar se mbi 76 mijë e punonjësve paguhen me pagën minimale.

Referuar raportit të Inspektoratit Shtetëror të Punës për vitin që lamë pas, vihet re gjithashtu se përpos shifrës së lartë të punonjësve që trajtohen me paga minimale, janë  evidentuar edhe një numër në rritje i punonjësve informalë, në 1580, pothuajse dyfish krahasuar me vitin 2017-ën ku u futën në skemën e kontributeve të Sigurimeve Shoqërore dhe Shëndetësore 608 persona.

Kjo shpjegohet edhe më numrin në rritje të inspektimeve nga vitit në vit të subjekteve dhe vendeve të punës. Konkretisht gjatë 2018 u ndërmorën mbi 4 mijë inspektime më shumë, duke u kontrolluar 12.297 subjekte private dhe shtetërore.

Sa i përket sektorëve, fokusi i inspektimeve ka qenë në sektorin e shërbimeve, tregti, hotele, bare-restorante ku informaliteti dhe abuzimet janë më të larta për shkak të punësimeve sezonale, ndërsa më pak vëmendje i është kushtuar sektorit elektricitet, gaz dhe ujë. Sa i takon qytetit, Tirana mban numrin më të lartë të inspektimeve.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.