Paige Viren në “Argument”: Investoni në turizëm lokal, jo në resorte

“Ndërtimi i restorteve të mëdha apo zhvillimi i turizmit të qëndrueshme në nivel lokal?” Kjo ka qenë një ndër pikat më të rëndësishme, diskutuar gjatë mbrëmjes së sotme në emisionin “Argument” të gazetarit Enio Civici, ku e ftuar ishte Dr. Paige Viren nga Universiteti East Carolina në SHBA.

Gjatë kësaj bisede ajo u shpreh se ndërtimi i një resorti të madh mund të duket si një investim i madh, por në fakt sipas saj, humbet sensi i elementit lokal, ku në shumicën e rasteve njerëzit vendas nuk punësohen dhe ushqimi i vendit nuk përdoret siç duhet.

Dr. Paige Viren ngre disa pikëpyetje gjatë kësaj interviste: “Nëse ndërtohet një resort i madh a e dëmton ai kulturën lokale? A e dëmton mjedisin lokal dhe a merren në konsideratë personat që jetojnë në zonën ku ndërtohet resorti?”.

Përgjigjen për pyetjet që ngre Dr. Viren e jep me një fjali të vetme duke thënë se me zhvillimin e qëndrueshëm të turizmit në shkallë më të vogël, investimi dhe paratë mbeten për njerëzit në nivel lokal.

“Për sa i përket resortit të madh, pyetjet që lindin janë kush punësohet, do të jenë pronarë njerëzit vendas apo korporatat? Kur fokusohemi te turizmi i qëndrueshëm ne e shikojmë atë në funksion tresh: i mirë për ekonominë, i mirë për kulturën dhe i mirë për mjedisin. Nëse ndërtohet një resort i madh në një vend të caktuar a tregohet ky “i ndjeshëm” ndaj kulturës dhe mjedisit, pra a balancon ato tre faktorët që përmenda? Nuk po them që nuk do të duhej një resort i madh diku, por pyetja është çfarë bën ky resort aty, a e dëmton kulturën lokale dhe mjedisin lokal, a i merr në konsideratë personat që jetojnë në zonën ku do të ndërtohet? Nëse bëhet turizëm i qëndrueshëm në shkallë më të vogël, atëherë punët janë lokale, ushqimi është i vendit, ky biznes, pra investimi dhe paratë mbeten për njerëzit në nivel lokal. Ndoshta resorti i madh mund të duket si një investim i madh, si një përfitues i madh, por në fakt nëpërmjet tij humbet sensi i elementit lokal, njerëzit në nivel lokal nuk punësohen, ushqimi nuk përdoret siç duhet”, shprehet Dr. Paige Viren për emisionin “Argument”.

Osman Dedja/SCAN  

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.