“Pak hetime me iniciativë të prokurorëve të SPAK” – Monitorimi: Vonesat në ngritjen e organeve kanë penguar hetimet, kryesojnë veprat për korrupsion 

Gjatë 20 muajve të funksionimit të SPAK, numri i hetimeve të nisur me iniciativë nga prokurorët e posaçëm është shumë i ulët, ndërkohë që më së shumti hetimet kanë nisur pas denoncimeve të qytetarëve”. Ky është një prej përfundimeve që ka arritur monitorimi ligjor i aktiviteteve të Prokurorisë së Posaçme Kundër Korrupsionit dhe Krimit të Organizuar, Byrosë Kombëtare të Hetimit dhe Gjykatës së Posaçme për Korrupsion dhe Krim të organizuar, realizuar nga Qendra Shqiptare për Gazetari Cilësore. Raporti konkludon gjithashtu se vonesat në ngritjen e strukturës së Prokurorisë së Posaçme apo edhe BKH-së kanë penguar veprimtarinë hetimore.

Raporti i monitorimit u fokusua edhe te mbulimi mediatik i aktiviteti të SPAK dhe BKH, teksa u konstatua se institucionet e reja të drejtësisë nuk kanë një strategji për të komunikuar me publikun.

Sipas raportit, për vitin 2020 SPAK ka pasur në hetim gjithsej 572 çështje, ndërsa deri në gusht të vitit 2021 459 çështje. Në total, për të 2 vitet e veprimtarisë janë çuar për hetim 102 çështje , nga të cilat 76 vepra që lidhen me korrupsion dhe 26 te tjera që lidhen me krimin e organizuar dhe vepra të tjera penale. Monitorimi përfshiu një periudhe 20-mujore, duke nisur nga tetori i vitit të kaluar

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.