Pak rimbursime ilaçesh për covid-19 – Të dhënat, deri në dhjetor e përfituan vetëm 6% e të prekurve nga infeksioni
Rimburimi i barnave për COVID-19 është përfituar nga vetëm 6% e personave të prekur nga infeksioni. Sipas të dhënave zyrtare nga Ministria e Shëndetësisë dhe Mbrojtjes Sociale gjatë vitit 2020, në total me paketat e rimbursimit për Covid janë trajtuar 1 708 persona. Ndërkohë që, referuar të dhënave të raportuara nga ky dikaster rezulton se për periudhën 19 nëntor, kur hynë në fuqi skemat e rimburimit deri në datën 31 dhjetor 2020 u regjistruan në total 27693 raste me COVID-19.
Paketa e barnave për trajtimin ambulator në banesë të të infektuarve parashikon rimbursimin 100% , të formës së lehtë dhe të moderuar të trajtimit, por jo më shumë se respektivisht 1 650 lekë dhe 10 900 lekë. Më herët ekspertët kanë renditur disa aryse për mungesën e rimbursimit, ku një prej tyre është interesi i ulët i qytetarëve për shkak të vlerës së ulët që mbulojnë paketat, në raport me kostot reale për trajtimin e infeksionit. Sipas përllogaritjeve të bëra nga organizata “Together for Life”, trajtimi për fazën e lehtë të sëmundjes shkon rreth 3 mijë lekë në javë, ndërsa për fazën e dytë kërkohen minimalisht 43 mijë lekë.
“Të dyja këto shuma janë shumë larg vlerës reale të trajtimit ambulator, ndërkohë që çmimi i medikamenteve dhe ekzaminimeve nuk janë e vetmja kosto që duhet të paguajnë pacientët Covid që trajtohen në shtëpi”,-thuhet në një dokument, që organizata ia ka dërguar edhe Ministrisë së Shëndetësisë. “Një i sëmurë Covid që duhet të kryejë edhe injeksionet, duhet të përballojë edhe koston e shërbimit në shtëpi nga infermieri, që në Tiranë ka shkuar deri në 10,000 lekë në ditë. Ndërsa, në rastet kur infektohet e gjithë familja, kostot shumëfishohen. Për katër anëtarë, duhet të kesh mënjanë të paktën 800,000 lekë për të përballuar infektimin me Covid-19”,-shtohet më tej në dokument.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.