Paketa “1 miliard për rindërtim”, Gjiknuri: Aksi i radhës do jetë Orikum-Himarë

Rruga Orikum-Himarë është projekti i radhës që do të ndërtohet nga paketa ‘1 miliard’, i qeverisë shqiptare. Ministri i Infrastrukturës dhe Energjisë, prezantoi nga Vlora projektin, ndërsa bëri me dije dhe investimet e tjerë që pritet të zbatohen në këtë qark.

“Vlora ka perspektivë zhvillimi nëse ka investime të këtij karakteri që unë po ju them. Ne jemi duke punuar për ti dhënë zgjidhje përfundimtare edhe problemit të mbetjeve në Vlorë, një investim që do të fillojë shumë shpejt nga qeveria shqiptare. Gjithashtu, bashkia ka sjellë një projekt për trajtimin e ujërave të zeza. Shumë shpejt do të lidhet kontrata për lotin e dytë të rrugës së Lumit të Vlorës dhe do pasohet me kontratën e tretë për të lidhur Selenicën me pjesën Levan-Tepelenë por dhe Qeparoin me pjesën e Kuçit”, u shpreh Gjiknuri.

Ndërkaq, në takimin me banorë të Novoselës, ministri Gjiknuri foli edhe për aeroportin e Vlorës si një vepër e cila do të nxisë ekonominë dhe punësimin në zonë.

“Po avancojmë edhe me Aeroportin e Vlorës që siç ju e dini do të ndërtohet në Akërni. Shpresoj që për disa muaj ne ta përfundojmë edhe kontratën dhe pastaj ne të fillojmë procesin e lejeve dhe ndërtimin e aeroportit. Ky investim do të sjellë shumë zhvillim dhe jo vetëm punësim për njerëzit këtu pasi do të ketë shumë shërbime. Do të ketë edhe një rrugë të re që të ketë një lidhje më të mirë të aeroportit me autostradën”, u shpreh Gjiknuri.

I pranishëm në takimet e zhvilluar në Vlorë ishte edhe ministri i Turizmit dhe Mjedisit, Blendi Klosi i cili tha se falë disa ndërhyrjeve që janë bërë në prag të sezonit turistik, pritet një numër më i lartë vizitorësh.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.