Paketa e 3-të ekonomike në M.Veriut – Nga bonusi i pushimeve, te fundjava që blen elektroshtëpiake pa TVSH
Kryeministri i Maqedonisë së Veriut Oliver Spasovski tha se qeveria do të implementojë një paketë të tretë masash që synojnë të zvogëlojnë ndikimin e shpërthimit të koronavirusit, duke mbështetur si qytetarët ashtu edhe ekonominë. Sipas paketës së fundit të masave të ndihmës ekonomike, 100,000 qytetarë të cilët janë të papunë ose marrin paga më të ulëta se 15,000 denarë (263/243 euro) në muaj do të marrin një stimul pagese prej 9,000 denar secili, si dhe kuponë dhe para për të shpenzuar për turizmin vendas , tha Spasovski në një konferencë shtypi.
Rreth 100,000 të rinj gjithashtu do të marrin 3,000 denarë në pagesa stimuluese secili, përveç kuponave për të mbuluar një pjesë të shpenzimeve të tyre të arsimit dhe të regjistrohen në trajnime dhe kurse për aftësi informatike dhe dixhitale. Për më tepër, qeveria po prezanton fundjavat pa TVSH, që do të zbatohen për mallra të caktuara, siç janë rrobat, mallrat e bardha (elektroshtëpike të mëdha, kryesisht frigoriferë apo lavatriçe) dhe librat për të stimuluar shpenzimet shtëpiake dhe për të rritur fitimin në industri të caktuara.
Paketa gjithashtu përfshin kompensimin financiar për njerëzit që kanë humbur vendin e punës në periudhën midis 11 Mars dhe 30 Prill. Paketa e re e masave përfshin 31 milionë euro shtesë të kredive pa interes për ndërmarrjet mikro dhe të vogla të themeluara ose të drejtuara nga gratë sipërmarrëse dhe punësimin e të rinjve. Financimi shtesë do të ofrohet për kompanitë për zhvillimin e produkteve dhe shërbimeve inovative. Qeveria po rrit gjithashtu mbështetjen financiare për punëtorët e bujqësisë dhe do të zbatojë një program të ri për financimin e mikrobujqësisë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.