Paketa e shpenzimeve prej 1.4 trilionë dollarëve/ Pritet miratimi i Senatit. Do të shmangë mbylljen e Qeverisë së SHBA
Dhoma e Përfaqësuesve në SHBA miratoi paketën e shpenzimeve prej 1.4 trilionë dollarë, që do të shmangë mbylljen e pjesshme të Qeverisë si dhe do të rrisë moshën e blerjes së duhanit në 21 vjeç dhe heqë shumë taksa të Aktit të Kujdesit Shëndetësor të Përballueshëm (ACA). Paketa e shpenzimeve i është drejtuar tashmë Senatit, ku politikanët synojnë ta miratojnë përpara se të përfundojë financimi aktual i Qeverisë ditën e Shtunë, duke shmangur betejën e buxhetit që solli ndërprerjen rekord prej 35 ditësh të shërbimeve qeveritare vitin e kaluar. Legjislacioni, i përpunuar mes politikanëve kryesorë dhe administratës së Trump, i mohon kërkesën prej 5 miliardë dollarë presidentit për të ndërtuar murin në kufirin me Meksikën.
Ndalimi i duhanit tek të rinjtë, që do të ndryshojë moshën minimale të blerjes së cigareve dhe pajisjeve elektronike në 21 nga 18 vjeç, do t’i japë Administratës së Barnave dhe Ushqimit (FDA) 6 muaj kohë për të zhvilluar rregulloret. Shpenzimi më i madh i paketës është për Departamentin e Mbrojtjes, që do të marrë një total prej 738 miliardë dollarë për vitin, 22 miliardë më shumë se viti i kaluar. Tek paketa e mbrojtjes,Senati miratoi krijimin e “Space Force”, që është dega e parë e re e ushtrisë amerikane në mbi 60 vite.
Paketa i jep punëtorëve federalë 12 javë leje lindje të paguar. Paketa përfshin gjithashtu 425 milionë dollarë në grante shtesë federale për të ndihmuar qeveritë lokale të përgatiten për zgjedhjet e Nëntorit 2020. Një pjesë e parasë do përdoret për të fuqizuar infrastrukturën kundër sulmeve kibernetike, pas ndërhyrjes së Rusisë në 2016-ën. Negociatorët ranë dakord për 7.6 miliardë dollarë për censusin e vitit të ardhshëm, që bëhet një herë në 10 vite. Zyra e Buxhetit projekton një defiçit buxhetor prej 960 miliardë dollarë në vitin fiskal 2019.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.