Paketa e shpëtimit për Lufthansa / Merr pëlqimin e aksionerit kryesor dhe të rregullatorëve të BE
Aksionet e Lufthansa u rritëm me 20% në sesionin tregtar të së Enjtes, pasi aksioneri kryesor pranoi paketën e shpëtimit prej 9 miliardë euro të Qeverisë, që synon të mbështesë kompaninë nga kolapsi që solli koronavirusi.
“Unë do të votoj për propozimin”, tha investitori miliarder Heinz Hermann Thiele për të përditshmen Frankfurter Allgemeine, pasi ka rritur së fundmi zotërimin tek Lufthansa në 15.5%. Pëlqimi i tij vjen pas 11 orësh të pushimit për linjën ajrore gjermane, prej shqetësimeve se ai mund të vendoste veton tek paketa e shpëtimit, që do t’i japë qeverisë 20% të aksioneve dhe vende në bordin mbikëqyrës.
Mbështetja e Heinz Hermann Thiele vjen si lehtësim për kancelaren Angela Merkel, pasi nuk mund të përballonte një tjetër kolaps të një firme prestigjoze, pas dështimit të kompanisë së pagesave Wirecard. Lufthansa punëson rreth 138 mijë njerëz dhe zotëron marka si Eurowings dhe Austrian Airlines. Kompania u përmbys nga pandemia e koronavirusit dhe si shumë rivalë në të gjithë botën, i drejtoi sytë nga shteti për ndihmë që të mbijetojë. Pavarësisht rritjes me 20% ditën e Enjte, aksionet ndodhen në rënie me 40% deri më tani për vitin. Rregullatorët e Bashkimit Europian miratuan gjithashtu paketën e shpëtimit, që ndalon dividendët, riblerjen e aksioneve dhe disa blerje të aseteve, deri sa të ripaguhet paraja e shtetit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.