Paketa fiskale në konsultim – Sipërmarrja “lumë” kërkesash, nga ulja e TVSH-së tek taksa e pronës
Ministria e Financave dhe Ekonomisë ka hapur konsultimet për paketën fiskale Qershor 2018, të cilat kanë nisur me shoqatat e biznesit. Ministri Arben Ahmetaj ka prezantuar pikat kryesore të paketës fiskale, si ulja e tatim fitimit në 5 për qind për bizneset me xhiro vjetore nga 8-14 milion lekë, lehtësi në agroturizëm dhe bujqësi si dhe në investimet në energjinë diellore.
Ndërsa, sipërmarrësit kanë listuar një sërë kërkesash, të cilat sipas tyre duhet të përfshihen në paketën fiskale, ku kryesorja është ulja e TVSH-së për disa sektorë, ulje të mëtejshme të tatim-fitimit, një paketë të plotë për bujqësinë duke ndjekur shembullin e rajonit, heqjen e taksës së pronës për apartamentet në stok, heqjen e taksimit 3 për qind për ndërtuesit që marrin leje për sipërfaqe mbi 2 mijë metër katror si dhe kufizim të ndërtimeve në zonat turistike.
Për disa nga kërkesat Ministri Arben Ahmetaj ka kthyer përgjigje direkte, ndërsa ka theksuar se do të rishikohen më në detaj.
Paketa fiskale për vitin 2019 do të bëhet me dy hapa, ku paketa paraprake do të miratohet brenda këtij sesioni parlamentar, ndërsa do të ketë edhe një paketë më të kompletuar që do të miratohet në vjeshtë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.