Paketa fiskale/ Si do të ndryshojë taksimi i gazit? Arsyet pse u ul dhe u unifikua akciza
Në paketën e re fiskale, qeveria shqiptare ka propozuar aplikimin e shkallës së taksimit me akcizë 6 lekë/litri për gazet e naftës dhe hidrokarburet e tjera gazoike.
Aktualisht niveli i akcizës për këtë nënprodukt është 8 lekë/litri nëse ai përdoret si lëndë djegëse për automjetet, ndërkohë që pjesa e këtij produkti që përdoret nga konsumatorët e tjerë, qoftë për qëllime industriale apo konsumi familjar nuk ngarkohet me akcizë.
“Projektligji, synon të vendosë një nivel akcize për gazin e lëngshëm pa diferencuar qëllimin e përdorimit, pasi siç është formuluar ligji aktualisht jep mundësinë e abuzivizmit me sasinë e gazit që nuk paguan akcizë” shkruhet në relacionin e projektligjit të siguruar nga SCAN.
Pas më shumë se një viti kontrollesh në zinxhirin e plotë të tregëtimit të gazit, sipas ministrisë së Financave, është konstatuar se unifikimi është e vetmja zgjidhje për uljen e evazionit në treg.
“Nga sasia e importuar e kësaj lënde djegëse, rreth 2/3 nuk ngarkohet me akcizë, që presupozon se nuk përdoret si karburant për automjetet, ndërkohë që vetëm 1/3 e sasisë së importuar deklarohet për përdorim automjetesh dhe ngarkohet me akcizë. Përvoja disa vjeçare ka treguar se administrimi i deklarimit të destinacionit të përdorimit të këtij nënprodukti është shumë i vështirë, duke krijuar mundësi për shmangie nga pagesa e akcizës.
Për këtë qëllim është i domosdoshëm unifikimi i nivelit të akcizës për të gjithë përdoruesit. Ky unifikim ul nivelin e akcizës nga 8 /lekë/litri në 6 lekë/litri duke ulur edhe koston e përdoruesve të mjeteve motorike, ndërkohë që rritja e akcizës për përdoruesit e tjerë industrialë dhe familjarë me 6 lekë/litri vërtet do të rrisë koston e përdorimit të kësaj lënde nga ata, por në kushtet kur diferencimi i akcizës lejon shmangien dhe mospagesën e saj, avantazhet krahasuese janë në favor të unifikimit të nivelit të akcizës” evidentohet në relacion.
Nga unifikimi i akcizës për gazet e naftës dhe hidrokarburet e tjera gazoike në nivelin 6 lekë/litri pritet që të arkëtohen rreth +375 milion lekë akcizë në vit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.