Paketa mbështetëse për transportin – MIE, Deda: Rimbursim për naftën e konsumuar, po shqyrtojmë çdo kërkesë
Pas kërkesave të operatorëve të transportit, qeveria po planifikon një paketë mbështetëse për përballimin e krizës financiare të shkaktuar nga COVID-19. Drejtori i Përgjithshëm i Politikave dhe Zhvillimit në Fushën e Infrastrukturës dhe Territorit, në Ministrinë e Infrastrukturës dhe Energjisë, Eltar Deda thotë për TV SCAN se deri më tani është vendosur se do të njihen si shpenzime të zbritshme në masën 100% konsumi i naftës, ndërkohë që paralelisht po shqyrtohen edhe kërkesat e tjera të shoqatave.
Deda flet edhe për reformën që po ndërmerret në këtë sektor, që do të prezantohen në muajin shtator të këtij viti.
Funksionimi i transportit publik në vend do të nisë në datën 15 qershor, ndërkohë që në bazë të protokolleve të miratuar nga Ministria e Shëndetësisë parashikohet ushtrimi i aktivitetit me 70% të kapacitetit, si dhe mbajtja e detyrueshme e maskave nga ana e punonjësve dhe pasagjerëve. Monitorimi i këtyre masave do të bëhet edhe nga Task-Forca e Transportit Rrugor, ndërkohë që në rast të moszbatimit do të merren dhe masat e parashikuara nga legjislacioni në fuqi.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.