Paladiumi prek nivel rekord. Rritet në 2,891 USD, prej kërkesës gjigante nga prodhuesit e makinave

Çmimi i paladiumit është rritur në nivel rekord të lartë dhe shumë analistë presin një vazhdim të këtij fuqizimi drejt 3,000 dollarë për onz, ndërkohë që prodhuesit e makinave kanë shtuar blerjet e metalit që përdoret për të neutralizuar tymërat e dëmshëm të shkarkimit.

Kjo ka përkeqësuar mungesën e ofertës. Zhvendosja tek makinat elektrike do të dobësojë kërkesën me kalimin e kohës, por në vitet e fundit, rregullat e ashpra mjedisore kanë detyruar makinat që të përdorin më shumë paladium tek motorrat me benzinë.   Mungesa e vazhdueshme e ofertës ka bërë që çmimet të rriten nga 500 dollarë për onz në vitin 2016 në 2,875.5 dollarë për onz pak përpara pandemisë, duke kthyer një nga metalet e çmuara më të lirë në më të shtrenjtin, shumë sipër arit dhe platinit.

Pritshmëritë për një defiçit më të thellë kanë rritur çmimet me 20% që nga mesi i muajit Mars, ndërkohë që paladiumi preku nivelin më të lartë të të gjitha kohërave prej 2,891.2 dollarë për onz ditën e Mërkurë. Diçka që nxiti rritjen ishte lajmërimi nga kompania ruse Nornickel, se përmbytjet tek minierat do ulin prodhimin në vitin 2021 me mbi gjysmë milionë onz, apo 5% të ofertës botërore.  Kërkesa nga industria e makianve nga ana tjetër pritet të rritet ndjeshëm.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.