“Palermo kur ishte fëmijë” – Fushata e pazakontë që bllokoi kryebashkiaku sicilian
“Palermo kur ishte fëmijë” është fushata e fotografes së njohur italiane, Letizia Battaglia, që ka ngjallur jo pak polemika në rrjetet sociale dhe jo vetëm. E gjithë ideja e projektit konsistonte në një set ku fëmijë dhe adoleshentë pozonin në mënyrë sensuale me makina luksoze Lamborghini.
Mirëpo, seti krijoi një ndasi në rrjetet sociale midis atyre që e konsideruan setin si fyes për qytetin dhe atyre që u përgjigjën se ishte një qëndrim censurues ndaj artit. Të premten, Kryebashkiaku sicilian, Leoluca Orlando, kërkoi të hiqej çdo imazh.
“Bashkia autorizoi një fushatë Lamborghini, përmbajtja e të cilit u paraqit si një projekt i shkëlqyer fotografik me një qëllim kulturor dhe shoqëror për të festuar bukuritë e Italisë, duke rritur cilësitë dhe identitetin e saj konkurrues përmes 20 rajoneve” shpjegoi Orlando, duke shtuar për mediat se nuk kishte marrë as para dhe as informacione të hollësishme mbi përmbajtjen e fushatës, me të cilën u njoh vetëm nëpërmjet rrjeteve sociale.
Nga ana tjetër, edhe Klubi Italian i Drejtorëve Artistikë, shoqatë që bashkon profesionistët e marketingut dhe komunikimit, është kthyer kundër fushatës së fotografes së famshme, e cila njihet gjithashtu për fushatat që “denoncojnë” fenomenet sociale.
“Fotografia, me shumë probabilitet ka ndjekur një ide që ka pasur në kokën e saj, Palermo kur ishte fëmijë, pa e kuptuar që ka shfaqur një gjë komplet tjetër. Një kartolinë e pakuptueshme e cila në vend që të përmirësojë imazhin e Palermos, e ka shfaqur atë edhe më arrogant, me atë makinë gare që pavarësisht përsosmërisë, si historia e markës, teknologjia avangarde, dizajni, shpërthen në mënyrë arrogante dhe me prepotencë kundër Palermos së përditshme, me një lajtmotiv të dobët reklamues të grave, motorrëve dhe parave. E vetmja diferencë është që në vend të grave, këtu ka vajza” u shpreh presidenti i Klubit Italian, Vicky Gitto.
Në përgjigje të polemikave, kompania e Lamborghini fshiu fotot nga profili i saj në Facebook.
“Ne kemi vendosur të eliminojmë postimet me fotot e Letizia Battaglia-s të bëra për projektin. ‘Me Italinë, për Italinë’. Na vjen keq që imazhet mund të kenë fyer ndjeshmërinë e qytetarëve të Palermos, por në këtë drejtim do të dëshironim të sqaronim se iniciativa e përgjithshme lindi si një akt dashurie nga Lamborghini për vendin e tij, për të mbështetur rihapjen e saj në një kohë me sfida të mëdha si ajo aktualja. Kur vendosëm të përfshijmë Letizia Battaglia-n, ishim të vetëdijshëm për forcën dhe fuqinë e imazheve të saj, pasi Battaglia, në karrierën e saj të gjatë si fotografe, është marrë me çështje aktuale dhe gjithmonë shumë delikate. Por, për ata që e njohin, dihet mirë se arti i saj dhe subjektet e saj janë përqendruar fuqimisht në portrete figurash të reja vajzash, të cilat për të përfaqësojnë një vizion të ëndrrës dhe shpresës së rilindjes. Në një frymë vazhdimësie të stilit të saj fotografik, Battaglia ka vendosur kështu të interpretojë Palermon e saj të dashur së bashku me një Lamborghini, një aksesor dhe jo protagonist i fotografive dhe vajzave, si një simbol i shpresës për një botë të re, e njëjta që ndiqet nga artistja gjatë gjithë viteve të angazhimit të saj të rëndësishme fotografike” shpjegon kompania, në përgjigje të kërkesës së Kryetarit të Bashkisë së Palermos, Leoluca Orlando.
Burimi: La Repubblica
Përshtati në shqip: SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.