Panairi i Punës në Gjirokastër – Ofrohen 420 vende pune dhe kurse të formimit profesional
Çelet panairi i punës në Gjirokastër. Sipërmarrje të ndryshme, në bashkëpunim me zyrat e punësimit ofrojnë 420 vende të lira pune, por edhe kurse të formimit profesional. Në çeljen e këtij panairi ishte i pranishëm edhe kryeministri, Edi Rama, i cili u njoh me mundësitë që ofrohen jo vetëm për Gjirokastrën, por edhe për zonat përreth. Sipas përfaqësuesve të Shërbimit Kombëtar të Punësimit, kërkesat nga ana e bizneseve për vende të lira pune janë në rritje ndërkohë që dhe kërkesat për punonjës të kualifikuar tashmë po kthehen në kriter.
“Janë dy kompani fason. Njëra kërkon 200 punëtorë, tjetra 50. Kemi pak vështirësi në gjetjen e njerëzve. Kualifikimi në përgjithësi është problem. Tani kërkojnë punëtorë të kualifikuar, të cilët njohin dhe kompjuterin. Njëra prej sipërmarrjeve që kërkon punëtorë, punon me kompani gjermane, që zënë 42 % të tregut të punës në Europë”
Sipas punëdhënësve shumë të rinj refuzojnë punën e ofruar.
“Mora dy djem të rinj, punuan 3 ditë dhe kapën 70 % të normës, ditën e katërt thanë nuk vijmë. Paga neto ishte 400 mijë lekë.”
Edhe Forcat e Armatosura përfaqësohen me stendën e tyre në panair ku ofrohen 100 vende të lira pune për ushtarakë.
“Janë 100 vende pune për ushtarake për ata që duan të bëhen pjesë e Forcave të Armatosura. Kjo ofertë vlen për ata që kanë mbaruar shkollën e mesme, që janë nën moshën 26 vjeç dhe dëshirojnë të bëhen pjesë e FA. Janë 50 vende të reja pune që hapen për oficer në muajin shtator, përveç këtyre që janë aktualisht. Që në momentin që ato fillojnë punë tek Forcat e Armatosura paguhen dhe njëkohësisht trajnohen për një vit. Pagesa është 400 mijë lekë të vjetra plus bonuset që përfitojnë.”
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.