Panariti: Më shumë mbështetje për peshkatarët dhe fermerët. Bisedime për 2 kolektorë të rinj në Liqenin e Pogradecit
“Do të bisedoj me ministrat e linjës, për dy kolektorë të tjerë të rinj për pastrimin e ujërave të liqenit të Pogradecit”. Kështu është shprehur ministri i Bujqësisë, Edmond Panariti gjatë një vizite në Qendrën e Mbarështimit të Rasatit të Koranit në Lin të Pogradecit.
Gjatë fjalës së tij, Panariti pohoi se: “Pas takimit me peshkatarët në Udenisht ku u njoha me problemet e tyre, erdha në këtë qendër, e cila është e rëndësishme për prodhimin e rasatit për Liqenin e Ohrit. Garantohet një sasi shumë e madhe prodhimi, 1 milion copë rasat. Pas takimit me peshkatarët, vendosa që ta hapim me 15 shkurt sezonin e peshkimit me grep”, u shpreh Panariti.
Gjithashtu ministri gjatë kësaj vizite nënvizoi se fermerët dhe peshkatarët kanë nevojë për mbështetje: “ Populli kërkon zhvillim, infrastrukturë dhe pune. Peshkatarët e fermerët duan mbështetje. Do të urdhëroj që të kontrollohen të gjitha pikat e shitjes së rrjetave jashtë standardit dhe do sekuestrojmë të gjithë ato të papërshtatshmet. Fermerëve dhe popullit nuk i intereson se me kë bëjmë 71 vota, ata duan zhvillim. Jemi në kohë tjetër, kur populli shqiptar kërkon mbështetje, punë, dhe investime”.
Panariti i bërë këto deklarata pas pyetjeve të gazetarëve në lidhje me koalicionin e ardhshëm zgjedhor.
Osman Dedja/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.