Panariti takon Eurodeputetin slloven. Bogoviç: Mbështetni fermerët e vegjël dhe krijoni markat shqiptare të produkteve
Ministri i Bujqësisë, Zhvillimit Rural dhe Administrimit të Ujërave, Edmond Panariti priti sot në një takim Eudoreputetin slloven Franc Bogoviç.
Takimi dhe biseda mes ministrit Panariti dhe europarlamentarit Bogoviç, kishin për qëllim shkëmbimin e ideve dhe eksperiencave të të dy vendeve, në lidhje me zhvillimin e bujqësisë. Theksi gjatë takimit u vu te zhvillimi rural, krijimi i markave, mbështetja e fermerëve të vegjël, si dhe asistenca për të thithur fonde nga Bashkimi Evropian për bujqësinë shqiptare.
Z.Bogoviç, gjatë bisedës i shpjegoi Panaritit modelin slloven të mbështetjes së zhvillimit të bujqësisë, nëpërmjet shoqatave bujqësore, të cilët sipas tij, që nga momenti i krijimit të kooperativave të përbashkëta, janë në gjendje të prodhojnë më shumë dhe të gjejnë tregjet për produktet e tyre.
“Duke qenë se Shqipëria ka ngjashmëri me Slloveninë, si një vend i vogël, vend me mundësi zhvillimi të bujqësisë, duhet të ndjekë shembullin slloven, pasi të dy vendet tona nuk është se kanë aftësi konkurruese me sasi prodhimi në tregjet evropiane. Ajo çfarë në Slloveni ka rezultuar me sukses dhe do të thoja që mund të ndiqet edhe nga Shqipëria, është mbështetja ndaj fermerëve të vegjël, të cilët mund të grupohen në shoqata bujqësore dhe në këtë mënyrë, rrisin prodhimin, si dhe bëjnë të mundur vetë, që të gjejnë tregjet për produktet e tyre”, tha ish-ministri slloven, Bogoviç, duke e vënë theksin edhe në “krijimin e produkteve të markës, pasi Shqipëria ka kushte natyrore të mrekullueshme, si dhe zhvillimin e fermave agroturistike, të cilat i shtojnë vendit tuaj jo vetëm prodhimin apo fuqizimin e fermerëve, por japin një ndihmë mjaft të çmuar në zhvillimin e turizmit”.
Nga ana e tij, ministri Edmond Panariti, duke e falenderuar eurodeputetin dhe përfaqësuesit diplomatik të Sllovenisë në Tiranë me vizitën, i ka njohur me zhvillimet e bujqësisë shqiptare gjatë viteve të fundit, mbështetjen që Ministria e Bujqësisë ka dhënë për fermerët, grandet dhe subvencionet për rritjet e kapaciteteve prodhuese, rritjet e prodhimit dhe eksportit të produkteve bujqësore etj.
Në kuadër të zhvillimit dhe fuqizimit të mëtejshëm të bujqësisë shqiptare, Panariti kërkoi që Sllovenia ta mbështesë Shqipërinë në përpjekjet e saj në Bashkimin Evropian, për fonde në lidhje me linja përpunimi, linja prodhimi, projekte të ndryshme në fushën e bujqësisë shqiptare.
Gjithashtu, Panariti kërkoi mbështetjen e europarlamentarit dhe nga Sllovenia, për projekte që kanë të bëjnë me bujqësinë turistike, pra agroturizmin, në ato projekte që quhen “zinxhiri i vogël” dhe ofrojnë mundësinë e ndërthurjes së komponentëve bujqësi-turizëm dhe që iu vijnë në ndihmë komuniteteve lokale.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.