Pandemia devijon shpenzimet e Bashkive – U shkurtuan 60 milionë dollarë investime, paratë shkuan për subvencione e ndihma

Problemet e shkaktuara nga Pandemia Covid 19 kanë devijuar në mënyrë të dukshme flukset e shpenzimeve të Bashkive në gjithë vendin. Scan Televizion ka zbardhur treguesit fiskale për nëntë muajt e parë të vitit të Publikuara nga Ministria e Financave, ku vërehet se janë shpenzimet për investime ato që janë tkurrur më së shumti për shkak tyrë Pandemisë.

Shpenzimet për investime pesuan një rënie të ndjeshme, në 9.4% e totalit të shpenzimeve të pushtetit vendor në 9 mujorin e vitit 2020, krahasuar me 33% që ishte kjo peshë një vit më parë. Si pasojë e efektit të pandemisë COVID-19, shpenzimet për investime ranë në nivelin e 8 miliard lekë nga 14 miliard lekë të realizuara në të njëjtën periudhë në 2019, me një vlerë negative prej rreth 60 milionë dollarë. Ndërkohë që Bashkia e Tiranës zë 51% të totalit të investimeve të realizuara nga pushteti vendor gjatë kësaj periudhe.

Shpenzimeve të tjera korrente (ku përfshihen edhe transfertat familjare, subvencionet) kanë pasur një rritje të ndjeshme gjatë 9 mujorit të parë 2020 duke arritur vlerën e 6.5 miliard lekë ose 15.9% e totalit të shpenzimeve Vendore. Keto shpenzime patën një rritje rreth 5.5 miliard lekë më shumë se 2019, si rrjedhojë e mbështetjes së drejtpërdrejtë që dhanë njësitë e vetëqeverisjes vendore në ndihma për familjet e prekura nga efekti i pandemisë.

Si pasojë e pandemisë COVID-19 dhe pasigurisë së krijuar, pushteti vendor ka ndryshuar strukturën e shpenzimeve sipas burimeve duke rritur peshën e shpenzimeve nga transfertat e buxhetit qendror (57%) dhe ulur shpenzimet nga të ardhurat e veta vendore (41%), ndryshe nga e njëjta periudhë e një viti më parë kur kjo strukturë ishte e barabartë 50%-50%. Krahasuar me të njëjtën periudhë të një viti më parë, gjatë 9 mujorit të vitit 2020 njësitë e vetëqeverisjes vendore kanë rritur peshën e shpenzimeve nga transfertat e buxhetit qendror me rreth 3 miliard lekë më shumë dhe ulur ndjeshëm shpenzimet nga të ardhurat e veta me rreth 3.7 miliard lekë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.