“Pandemia do të përfundojë së shpejti” – Premtimi i fundit i Trump përpara zgjedhjeve presidenciale
Presidenti Donald Trump u premtoi mbështetësve të tij në Florida, se pandemia e koronavirusit do të mbarojë së shpejti dhe akuzoi rivalin demokrat Joe Biden për mbivlerësim të krizës shëndetësore për të trembur amerikanët me kusht që të votojnë për të. Pandemia, e cila ka marrë jetën e më shumë se 224,000 njerëz në Shtetet e Bashkuara dhe u ka kushtuar vendet e tyre të punës, është bërë çështja mbizotëruese e fushatës, ku Trump mbron me fanatizëm mënyrën se si e ka administruar trajtimin e krizës.
Biden më herët gjatë ditës së djeshme tha se Trump kishte hequr dorë nga menaxhimi i virusit dhe premtoi se nëse fiton zgjedhjet e 3 nëntorit ai do t’i kërkojë Kongresit të miratojë një projekt-ligj të plotë COVID-19 të cilin ai do të nënshkruajë brenda 10 ditëve të para të marrjes së detyrës.
“Ai është larguar nga Amerika. Ai thjesht dëshiron që ne të bëhemi të mpirë”, tha Biden gjatë një fjalimi në qytetin e tij të lindjes Wilmington, Delaware. “Unë nuk do të mbyll ekonominë. Unë nuk do ta mbyll vendin. Unë do të mbyll virusin.”
Ndërkaq, gjatë dy tubimeve në shtetin fushëbetejë të Florida, Trump u shpreh se Biden po përhap panik duke thënë se Shtetet e Bashkuara po hynin në një “dimër të errët”. Ai tha se ish-nënkryetari dhe aleatët e tij demokratë po përpiqeshin të trembnin njerëzit duke mbivlerësuar kërcënimin e virusit. “Ne do ta përfundojmë shpejt këtë pandemi” ju drejtua kështu Trump një komuniteti të gjerë pensionesh në Floridan qendrore.
Më vonë, Trump i tha një turme të madhe në Pensacola se zgjedhjet ishin një zgjedhje “midis një bumi dhe një bllokimi”. Studiuesit në Institutin e Universitetit të Uashingtonit për Matjet dhe Vlerësimin e Shëndetit paralajmëruan të premten se virusi mund të vriste më shumë se gjysmë milioni njerëz në Shtetet e Bashkuara deri në fund të Shkurtit 2021. Ndërkaq, sipas studimit, afërsisht 130,000 jetë mund të shpëtoheshin nëse të gjithë do të kishin përdorur maska që në fillimet e pandemisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.