Pandemia, e pësojnë pronarët – Kompensimet, Ministria e Financave: Nga 40 milion dollarë për vitin 2020, janë shpërndarë 17 milionë
Kategoria e pronarëve duket se është me e prekura nga problemet e shkaktuar nga Pandemia Covid 19, qoftë për shkak të mosfunksionimit për një kohë të konsiderueshme të sporteleve të ATP, por edhe për shkak të shkurtimit të fondeve nga ana e Ministrisë së Drejtësisë. Televizion Scan ka zbardhur treguesit fiskalë të publikuar nga Ministria e Financave për periudhën janar-nëntor 2020, ku bie në sy se për këtë kategori janë përdorur vetëm 42% të fondeve të planifikuara në buxhet. Ndërsa ishin parashikuar që fondet për këtë kategori të ishin 4 miliardë lekë, rreth 40 milionë dollarë deri në fund të vitit, deri në muajin nëntor, Agjencia e Trajtimit të Pronave ka përdorur për kompensimin e tyre vetëm 1.7 miliardë lekë, rreth 17 milionë dollarë.
Gjithsesi, edhe ky fond, në pjesën dërrmuese të tij është përdorur për kompensimin e pronarëve të prekur nga ndërtimet informale të legalizuara apo në process legalizimi. Shoqatat e pronarëve ankohen se Agjencia e Trajtimit të Pronave ka ndalur thuajse tërësisht kompensimet, duke u dhënë përparësi vetëm kompensimeve me kusht, kur pronarët pranojnë t’i falin shtetit pjesën më të made të shumës në këmbim të kompensimit të shpejtë në kohë.
Shkurtimi i fondeve për pronarët për shkak të Pandemisë reflektohet edhe në të dhënat zyrtare të Ministrisë së Drejtësisë. Për tetë muajt e parë të vitit, kjo Ministria ka shkurtuar me rreth 7 milionë dollarë shpenzimet. Buxheti fillestar I miratuar në fund të vitit 2019 prej 10.8 miliardë lekësh, është ulur në 10.1 miliardë lekë me Aktin Normativ të 2 Korrikut.
Shkurtime kanë shënuar thuajse të gjithë programet. Nga të dhënat e Ministrisë rezulton se në programin “Planifikim, Menaxhim dhe Administrim” janë pakësuar 93 milionë lekë, rreth 900 mijë dollar, ndërkohë që në programin “Ndihma Juridike” janë pakësuar 30 milionë lekë.
Shkurtime kanë shënuar edhe Programet për “Publikimet Zyrtare”, “ Mjekësia Ligjore”, “Shërbimi i Përmbarimit Gjyqësor”, apo “Shërbimi për Çështjet e Birësimeve”. Ndërkohë që ka qenë program “Shërbimi i Kthimit dhe Kompensimit të Pronave” që ka pësuar shkurtimin më të fortë prej 530 milionë lekësh, afërisht 5 milionë dollarë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.