Pandemia, e “pësojnë” sigurimet e udhëtimeve – 2021, Portofoli “Jetë dhe shëndet në udhëtim” bie me 82%, kartoni jeshil rënie me 31.6%

Kufizimi i lëvizjeve për shkak të Pandemisë gjatë muajve të parë të këtij viti ka goditur veçanërisht segmentet që lidhen me udhëtimet jashtë kufijve të tregut të sigurimeve, goditje që gjithsesi është amortizuar nga rritja e fortë e kontratave për sigurimin nga fatkeqësitë natyrore. Në raportin e tij të fundit, Autoriteti i Mbikëqyrjes Financiare zbardh se në zërin “Jetë dhe shëndet në udhëtim” pati një rënie me 82% të arkëtimeve për dy muajt e parë të këtij viti. Nga 2,6 milionë dollarë të arkëtuara në periudhën janar shkurt 2020, ato ranë në 470 mijë dollarë për dy muajt e parë të këtij viti. Rënie të fortë, megjithëse jo në këto nivele, ka shënuar edhe portofoli I kartonit jeshil, I cili rezulton në rënie me 31.6% krahasuar me janar shkurt 2020. Kompanitë kanë arkëtuar në total 1.7 milionë dollarë nga kontratat e sigurimit të kartonit jeshil, ndërkohë që në të njëjtën periudhë të vitit 2020 arkëtimet ishin thuajse 2.6 milionë dollar.

E megjithatë, lajmi i mirë për kompanitë e sigurimit është se rënia e këtyre zërave është balancuar nga rritjet e treguesve në portofolin e sigurimit nga katastrofat natyrore.

Të ardhurat nga primet e shkruara bruto të sigurimit për periudhën janar-shkurt 2021 kapën vlerën mbi 2,824 milionë lekë, ose 6.31% më shumë se në periudhën janar-shkurt 2020. Ndërkohë që numri i kontratave të sigurimit të lidhura arriti në 140,013 me një ulje prej 27.01% krahasuar me periudhën janar-shkurt 2020.

Tregu vazhdoi të mbetet sërish i orientuar tek sigurimet e Jo-Jetës, të cilat sollën 93.63% të vëllimit të përgjithshëm të primeve, duke i lënë përkatësisht sigurimet e Jetës me 6.37%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 43.89% dhe primet e shkruara bruto të sigurimit të detyrueshëm zënë 56.11% të totalit të tregut.

Gjatë periudhës janar-shkurt 2021, dëmet e paguara bruto në tregun e sigurimeve, arritën në rreth 1,396 milionë lekë, ose 20.16% më pak se në periudhën janar-shkurt 2020.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.